7-ci siniflər arasında debat keçirildi
Bu gün Azərbaycan bölməsinin 7-ci sinifləri arasında “Mərkəzləşmiş Azərbaycan Səfəvi dövləti” mövzusunda debat keçirildi. Şagirdlər Azərbaycan tarixinin ən qüdrətli dövlətlərindən biri, bəlkə də birincisi olan Səfəvilər dövləti haqqında geniş məlumat verdilər. Onlar Səfəvilər dövlətinin 1501-ci ildən 1736-cı ilə qədər olan zəngin tarixi haqqında ətraflı müzakirələr apardılar. XVI əsrdə Səfəvilər dövlətinin ictimai-iqtisadi, siyasi, mədəni, ideoloji mərkəzi olan Azərbaycan, Səfəvi-Osmanlı müharibələri, Səfəvilərə rəhbərlik edən hökmdarlar, Səfəvilər dövlətinin müxtəlif vaxtlarda dəyişilən paytaxtları haqqında fikir mübadiləsi apardılar.
Rus bölməsinin 7-ci sinifləri isə dəyirmi masa ətrafında toplaşaraq, böyük Azərbaycanımızın Atabəylər dövləti haqqında danışıqlar və müzakirələr apardılar. Müzakirələr əsasında şagirdlər bu dövlətin yaranması, genişlənməsi və tənəzzülünə gətirən bütün faktları araşdırdılar. Onlar böyük tarixi şəxsiyyət Atabəy Eldəniz Şəmsəddinin keçdiyi tarixi yolu və Atabəylər dövlətinin sonrakı inkişaf mərhələlərini təhlil etdilər. Tədbir zamanı şagirdlər tərəfindən hazırlanmış təqdimat və çarxlar da nümayiş olundu.
