“Dönəcəyimiz gün yaxındadır, Xocalı!”
Fevralın 26-da ilk dərslər Xocalı faciəsinin 26-cı ildönümünə həsr olundu. Məktəbin bütün siniflərində ötən il şagirdlərimiz tərəfindən çəkilən “Bir gecənin məşəqqəti” filmi nümayiş olundu. Daha sonra məktəbimizin müəllimləri faciə ilə bağlı müzakirələr apardılar. Elə həmin gün məktəbdə “Dönəcəyimiz gün yaxındadır, Xocalı!” adlı tədbir keçirildi. Əvvəlcə Xocalı soyqırımında şəhid olmuş həmvətənlərimizin xatirəsi bir dəqiqəlik sükutla yad olundu. Azərbaycan tarixinə ən dəhşətli səhifə kimi daxil olan bu gün haqqında məktəbin tarix müəllimi Nüşabə Qarayeva dolğun məlumat verdi. Məktəbin yuxarı sinif şagirdləri də faciə haqqında çox təsirli və zəngin faktlar dilə gətirdilər. Sonra kiçik yaşlı şagirdlər faciə qurbanlarına həsr olunmuş kompozisiya ilə tədbiri davam etdirdilər.
