Məktəbimizdə "Bilik günü" qeyd olundu
Sentyabrın 15-də Mikayıl Müşfiq adına 18№ li məktəbdə Bilik günü qeyd edildi. Tədbirdə müəllimlər, şagirdlər, valideynlər, Rayon İcra Hakimiyyətinin, Bakı Şəhəri üzrə Təhsil İdarəsinin nümayəndələri və digər qonaqlar iştirak edirdi. Tədbiri giriş sözü ilə açan məktəbin direktoru Rəna Süleymanova hamını bu bilik bayramı münasibətilə təbrik etdi, təhsildə, məktəb quruculuğunda gedən yeniliklər barədə danışdı. Həmçinin “Yeniləşən Azərbaycan” layihəsi çərçivəsində yeni dərs ili ərzində ölkəmizin bir sıra məktəblərində olduğu kimi, 18 nömrəli məktəbdə də “Sağlam təhsil” siniflərinin açılmasını qeyd etdi və valideynləri bu layihənin üstünlükləri ilə tanış etdi. Tədbirdə iştirak edən Bakı Şəhəri üzrə Təhsil İdarəsinin ümumi sektor müdiri, pedaqoji elmlər üzrə fəlsəfə doktoru Sevinc Rəsulova ,Yasamal rayon İcra Hakimiyyətinin şöbə müdiri Söhrab Cəfərov və Azərbaycan Respublikası Dini Qurumlarla İş üzrə Dövlət Komitəsinin sədr müavini Səyyad Salahlı öz növbələrində müəlim kollektivinə,şagirdlərə təhsildə yeni uğurlar və nailiyyətlər arzuladılar. Tədbir ilk zəngin səslənməsi ilə başa çatdı.
