Məktəblilər arasında hərbi vətənpərvərliyin təbliği mövzusunda görüş keçirildi
“İnnovativ Təşəbbüslər” İctimai Birliyinin təşəbbüsü, Elm və Təhsil Nazirliklərinin dəstəyi ilə bu gün məktəbimizdə hərbi vətənpərvərlik mövzusunda tədbir keçirildi. Tədbirdə məktəbimizin direktoru Leyla Fətiyeva, İB sədri Əşrəf Əhmədov, Şuşa Fatehi Şərbət Mahmudov, Azərbaycan Respublikası Mədəniyyət Nazirliyinin Milli Azərbaycan Tarixi Muzeyinin Vətən Müharibəsi Fondunun müdiri, tarixçi Şəfa Mövsümov, şagird və müəllim heyəti iştirak edirdi. Azərbaycan Respublikasının Dövlət Himni səsləndikdən sonra ərazi bütövlüyümüz uğrunda canlarını fəda vermiş şəhidlərin əziz xatirəsi bir dəqiqəlik sükutla yad edildi. Tədbirdə hərbi vətənpərvərlik mövzusunda maarifləndirici videoroliklər nümayiş olundu. İB sədri Əşrəf Əhmədov çıxışında bildirdi ki, Azərbaycan Ordusunun şanlı zəfər ilə bərpa etdiyi ərazi bütövlüyümüzü qoruyub saxlamaq, inkişaf etdirmək yetişən gənc nəsil üçün ən əsas vəzifə borcudur. Tədbirdə iştirak edən tarixçi Şəfa Mövsümov da çıxış edərək məktəblilər arasında hərbi vətənpərvərliyin təbliği, zərərli vərdişlərdən uzaqlaşmaq və s. mövzularda aparılan işlərdən danışdı. O, həmçinin Milli Azərbaycan Tarixi Muzeyinin Vətən Müharibəsi Fondunda mühafizə edilən şəhid və qazilərimizə məxsus materiallar barədə də məlumat verdi. Tədbirdə iştirak edən 44 günlük Vətən Müharibəsinin iştirakçısı olmuş Şuşa Fatehi Şərbət Mahmudov keçdiyi döyüş yolundan, Şuşanın necə azad olunmasından, qürurverici hisslər yaşadığı anlardan fəxrlə danışdı . Tədbirin sonunda qəhrəman qazimiz şagirdlərin və müəllimlərin suallarını cavablandırdı.
