Həyat dəyərlidir, onu narkotikə qurban vermə ! - narkomaniyaya həsr olunmuş tədbir keçirildi
Bu gün məktəbimizdə narkomaniyaya həsr olunmuş “Həyat dəyərlidir, onu narkotikə
qurban vermə!” adlı tədbir keçirildi. Tədbirdə rəhbərlik, məktəbin tibbi heyəti və
VIII-IX sinif şagirdləri iştirak edirdilər. Tədbiri giriş sözü ilə məktəbin həkimi Arzu
Qafarova açaraq şagirdlərə narkotik vasitələrdən istifadənin insan sağlamlığına mənfi
təsirləri haqqında ətraflı məlumat verdi. Bildirdi ki, narkotik vasitələrdən istifadənin
insan sağlamlığına vurduğu zərbələri aradan qaldırmaq mümkünsüzdür. Sonra
məktəbin psixoloqu Arzu Məmmədova “Həyat dəyərlidir, onu narkotikə qurban
vermə!” adlı təqdimatla çıxış etdi. Narkomaniya və onun fəsadları haqqında ətraflı
məlumat verən psixoloq bildirdi ki, narkomaniya insan həyatının məhvi, sonu
görünməyən uçurumdur. Təşkilatçı müavin Rəvanə Məmmədova narkomaniyanın nə
qədər böyük bir bəla olması haqda şagirdlərə məlumat verərək, maarifləndirici
tədbirlərin əhəmiyyətindən bəhs etdi. Məktəbin psixoloqu Günel Mahmudzadə, tibb
bacısı Aytac Əliyarova narkomaniyanın, eləcə də zərərli vərdişlərin fəsadları
haqqında şagirdlərə məlumat verdilər. Tədbir şagirdlər tərəfindən verilən sualların
cavablandırılması və fikir mübadiləsi ilə yekunlaşdı.
