Ekoklub üzvlərinin astronavtlarla görüşü
74-cü Beynəlxalq Astronavtika Konqresi çərçivəsində 5 oktyabr 2023-cü il tarixində Azərbaycan Respublikasının Kosmik Agentliyi - Azərkosmos və Elm və Təhsil Nazirliyi Respublika Uşaq-Gənclər İnkişaf Mərkəzinin birgə təşkilatçılığı ilə astronavtlar Dumitru Dorin Prunariu və Victor Hespanha ilə görüş keçirilib. Görüşdə Bakı şəhəri M.Müşfiq adına 18 nömrəli tam orta məktəbdə fəaliyyət göstərən “Ekoerudit” ekoklubun fəal üzvləri 7-ci sinif şagirdləri Əziz Babyev, Leyla Kazımova, Rüqəyyə Əsədova, Fəridə Əsədova, 8-ci sinif şagirdi Solmaz Dadaşova iştirak ediblər.
Respublika Uşaq-Gənclər İnkişaf Mərkəzinin direktoru Firuzə Sultan-zadə Ümumdünya Aviasiya və Kosmonavtika günü ilə əlaqədar hər il təşkil edilən tədbirlər və məktəblilərin bu sahəyə böyük marağı haqqında, Azərbaycan Respublikasının Kosmik Agentliyinin Təhsil və Tanıtım üzrə meneceri İmran Muxtarov Beynəlxalq Astronavtika Konqresi 2023 layihəsi və Astronavtlar Proqramı haqqında tədbir iştirakçılarına məlumat veriblər.
Rumıniyalı astronavt Dumitru Dorin Prinariu və braziliyalı astronavt Victor Hespanha Kosmik missiya, kosmosa uçuş təcrübəsi barədə öz uğur hekayələrini ekoklub üzvləri ilə bölüşüblər. Daha sonra astronavtlar məktəbliləri maraqlandıran sualları cavablandırıblar. Sonda qonaqlar ekoklub və gənc astronomlar dərnəyinin üzvləri ilə xatirə foto-şəkilləri çəkdiriblər. Görüşdə Respublika Uşaq-Gənclər İnkişaf Mərkəzinin 100-ə yaxın ekoklub üzvləri iştirak ediblər.
Qeyd edək ki, ekoklub üzvü, məktəbin 8-ci sinif şagirdi Solmaz Dadaşovanın “Titania peyki” mövzusunda təqdim etdiyi inşa 2021-ci ildə Elm və Təhsil Nazirliyi Respublika Uşaq-Gənclər İnkişaf Mərkəzi, NASA və Tusi-Bohm Planetariumun birgə təşkilatçılığı ilə keçirilən məktəblilər arasında ”Scientist for a day” (“Bu günün alimi”) inşa-yazı müsabiqəsində Amerika Milli Kosmik Agentliyinin (NASA) xüsusi diplomu və hədiyyə mükafatlandırılıb.
Ümumdünya Kosmos Həftəsi BMT Baş Assambleyasının qərarı ilə 2000-ci ildən başlayaraq hər il 4-10 oktyabrda keçirilir. 4 oktyabr (1957) Yerin ilk süni peyki “Sputnik-1”in orbitə çıxarıldığı gün, 10 oktyabr (1967) isə “Ay və digər səma cisimləri də daxil olmaqla, kosmik fəzanın tədqiqi və istifadəsi üzrə dövlətlərin fəaliyyət prinsipləri haqqında” müqavilənin imzalandığı tarixdir.
