STEAM layihəsi çərçivəsində təlim xarakterli daha bir görüş keçirildi
Bu gün məktəbimizin VII-VIII siniflərinin şagirdlərindən ibarət olan 5 nəfərlik komandamızla 189-190 nömrəli tam orta məktəbin bir daha qonağı olduq. Təlimdə STEAM çərçivəsində maraqlı məlumatlar öyrənildi, yarışlar keçirildi, şagirdlərimiz praktiki olaraq öyrənilənlərin tətbiqi ilə su enerjisi ilə işləyən qurğuların düzəldilməsində iştirak etdilər.
STEAM təhsil metodu şagirdlərə beş sahənin, Elm (Science), Texnologiya (Technology), Mühəndislik (Engineering), İncəsənət (Art) və Riyaziyyatın (Math) birgə və inteqrasiya olunmuş şəkildə tədrisi ideyası üzərində qurulub. STEAM kurikulumu fənlərarası, praktik və tətbiqi dərslərdən ibarətdir. Elmin və texnologiyaların öyrədilməsində ənənəvi yanaşmadan fərqli olaraq, STEAM təhsili praktik məşğələlər vasitəsilə elmi, texniki biliklərin gündəlik həyatda tətbiqini şagirdlərə göstərir. Bu yanaşma şagirdlərə mühəndislik səriştələri öyrədərək, onların real həyatda problemlərin həlli zamanı tətbiqini aşılayır. STEAM fənləri şagirdləri hansı peşə seçmələrindən asılı olmayaraq həyata hazırlayır.
Layihənin tətbiq edilməsində məqsəd müasir təhsil çağırışları əsasında inkişaf etmiş ölkələrdə tətbiq edilməyə başlanılan təhsil yeniliklərinin ölkəmizdə tətbiq edilməsi imkanlarının öyrənilməsi və tədris edilməsidir.
