Bir damcı...
Ölkə əhalisinin diqqətini sudan səmərəli istifadə vərdişlərinə yönəldən “Bir
damcı” kampaniyasına Azərbaycan Respublikası Ekologiya və Təbii Sərvətlər
Nazirliyi, “Azərsu” ASC, Azərbaycan Meliorasiya və Su Təsərrüfatı Açıq Səhmdar
Cəmiyyəti və IDEA İctimai Birliyi tərəfindən start verilib. Azərbaycan
Respublikası Elm və Təhsil Nazirliyinin Respublika Uşaq-Gənclər İnkişaf
Mərkəzinin təşkilatçılığı ilə ümumtəhsil məktəblərində fəaliyyət göstərən
ekoklublarda bu məqsədlə silsilə maarifləndirmə tədbirləri keçirilib. Bakı şəhəri
M.Müşfiq adına 18 nömrəli tam orta məktəbdə fəaliyyət göstərən “Ekokerudit”
ekoklub üzvlərinin, 6-7-ci sinif şagirdlərinin və qonaqların iştirakı ilə dəyirmi masa
təşkil olunub. Tədbirdə Azərbaycan Respublikası Ekologiya və Təbii Sərvətlər
Nazirliyi və IDEA İctimai Birliyinin nümayəndələri sudan qənaətlə istifadənin
vacibliyi barədə geniş təqdimatla çıxış ediblər. Təqdimat zamanı şagirdlər
kampaniyanın məqsədi, sudan səmərəli istifadənin vacibliyi, gündəlik həyatda
qənaət yolları, gələcəkdə bizi gözləyə biləcək təhlükələr barədə məlumatlandırılıb.
Şagirdlər sual-cavabda fəal iştirak edərək, məktəbdə və evdə suya qənaət etmək
üçün müxtəlif təkliflərlə çıxış ediblər. Məktəblilərə sudan düzgün istifadənin
əhəmiyyəti barədə biliklər toplusu olan “Bir Damcı” kitabı və müxtəlif hədiyyələr
təqdim edilib. “Bir damcı” kampaniyası barədə ətraflı məlumatı birdamci.az veb-
saytından, Facebook və Instagram səhifələrindən əldə etmək mümkündür.
