“Təbiətin harayı” ekoloji səhnəcik
Müasir dövrdə ətraf mühitin plastik tullantılarla cirkləndirilməsi problemi dünya
ölkələrinin diqqət mərkəzindədir. İnsanın yaratdığı plastik qablar və sellofan paketlər
torpağı, suyu çirkləndirir, bitki və heyvan növlərinin həyatı üçün təhlükə yaradır. Plastik
tullantılardan okeanlarda yaranmış 5 süni ada problemin qlobal miqyasda həllinin
vacibliyini göstərir. Bakı şəhəri M.Müşfiq adına 18 nömrəli tam orta məktəbdə fəaliiyyət
göstərən “Ekoerudit” ekoklubun üzvlərinin təqdim etdikləri “Təbiətin harayı” adlı ekoloji
səhnəcikdə mühitin çirkləndirilməsi və insanın təbiətə məsuliyyətli münasibətindən
bəhs edilir.
“Yaşıl şəbəkə” ekoloji maarifləndirmə proqramı çərçivəsində məktəbin 7-ci sinif
şagirdlərinin iştirakı ilə ifa olunan səhnəcikdə təbiətdə 200-400 il cürüməyən,
yandırılarkən diqoksin adlı kanserogen maddə yaradan plastik məhsulların həm
insanlar, həm də bütün canlılar üçün nə qədər təhlükəli olduğu qeyd olundu. Gənc
ekoloqlar təbiəti təmsil edən palıd ağacı, dövşan, tülpan, balıq və digər canlıların “ekoloji
məhkəməyə” müraciətini alleqorik şəkildə ifa edərək məktəblilərin diqqətini plastik
tullantıların azaldılmasının vacibliyinə yönəltdilər. “Ekoloji məhkəmə”nin sonunda
dünyaya hökmranlıq etmək iddiasında olan “Plastik kraliçaya” qalib gəlmək üçün ekoloji
təbliğatın gücləndirilməsi, sağlam həyat naminə ətraf mühitin qorunması üşün hər kəsin
plastiksiz həyata üstünlük verməsi təklif edildi.Tədbirdə iştirak edən məktəbin Tərbiyə
işləri üzrə direktor müavini Rəvanə Məmmədova, kitabxana müdiri Pakizə Quliyeva və
ekoklubun rəhbəri, Elm və Təhsil Nazirliyi “Respublika Uşaq-Gənclər İnkişaf Mərkəzi”
Publik Hüquqi Şəxsin direktor müavini, b.ü.f.d. Lalə Dadaşova tullantıların azaldılması
barədə 6-cı sinif şagirdlərinin maraqlı təkliflərini dinləyərək onları maraqlandıran suallara
cavab verdilər.
