Günəştək zirvədə olanlar
27 sentyabr Anım Gününü ibtidai siniflərimiz də xüsusi qeyd etdi. Bütün siniflərdə şəhidlər bir dəqiqəlik sükutla yad edildi. Hər sinif otağına adı verilmiş şəhidlərin həyatı və döyüş yolundan bəhs edildi. Müəllimlər onların qəhrəmancasına canlarını fəda etdikləri Vətən torpağını lap körpəlikdən sevməyi, onu qorumağı, hər an keşiyində bir müzəffər əsgər kimi fəxr və qururla dayanmağı şagirdlərə tövsiyə etdilər.
Şəhid məzunlarımızdan olan Ələkbər Ələsgərovun adını daşıdığı sinfin şagirdləri qəhrəmanımızın şəkli önünə çiçəklər düzərək onun əziz xatirəsini yad etdilər.
Daha sonra ibtidailər müxtəlif kompazisiyalarla çıxış etdilər. Şəhidlik zirvəsinə ucalmış igidlərimizin şəkli əks edilən xüsusi hazırlanmış pankartları nümayiş etdirərək onların mübarizə yolundan söhbət açdılar. Sonda Qarabağın işğaldan azad edilmiş şəhər və rayonları barədə videoçarxlar şagirdlər tərəfindən maraqla izlənildi.
