Ağ çələngli Azərbaycan!
15.11.2016-cı il tarixində M.Müşfiq adına 18№li məktəbdə 17 noyabr Milli Dirçəliş gününə həsr olunmuş "Ağ çələngli Azərbaycan" mövzusunda konfrans keçirildi. Konfransda 9-cu sinif şagirdləri istiqlala aparan yol haqqında hazırladıqları məruzə və tədqiqat işlərini tədbir iştirakçılarına təqdim etdilər. Onlar 17 noyabr hadisələrində xalqın azadlıq səsini ucaldaraq, imperiyaya qarşı hamılıqla ayağa qalxmasından, milli şüurun oyanışından, dirçəliş yolunda verilən qurbanlardan, meydan hərəkatının liderlərindən və istiqlalın keçdiyi enişli-yoxuşlu yollardan söhbət açdılar.Şagirdlərin hazırladıqları məruzələr bir-birindən maraqlı və dolğun idi. "Qaranlıq yolun işığı", "Azadlıq mücahidləri", "Ağ çələngli Azərbaycan" mövzularında hazırlanmış təqdimatlar xüsusi maraq doğurdu. Konfransda 4-cü sinif şagirdi Mahmudova Əminənin "Əyilməyən xalq" mövzusunda çıxışı və müasir Azərbaycan haqqında söylədiyi fikirlər çox təsiredici oldu və hamı tərəfindən böyük rəğbətlə qarşılandı. Sonda şagirdlərin üçrəngli dövlət bayrağını salona gətirərək söylədikləri kompozisiya tədbirə xüsusi rəng qatdı.Konfransda Yasamal Rayon İcra Hakimiyyətinin nümayəndələri, Yasamal rayon məktəblərinin müəllim və şagirdləri də iştirak edirdi.Ağ çələngli Azərbaycan, Dirçəliş günün mübarək!
