Ekoklub liderlərinin Forumu
Məktəbimizdə fəaliyyət göstərən “Ekoerudit” ekoklubun üzvləri ətraf mühit haqqında ekoloji biliklərə yiyələnməklə yanaşı müxtəlif müsabiqələrdə, forumlarda, bilik yarışlarında, vebinarlarda fəal iştirak edirlər. Bakı şəhərində və respublikanın 57 rayonunda fəaliyyət göstərən “Yaşıl şəbəkə” ekoklub liderlərinin VI Respublika Ekoloji Forumunda bu il məktəbimizin gənc ekoloqları da uğurla iştirak etmişlər. Ekoklub liderləri Səma Balayeva, Məryam Qulammirzəyeva və Sevinc Şirəliyeva görkəmli alimlərin, dövlət xadimlərinin iştirakı ilə keçirilən onlayn Forumda ətraf mühitin qorunması barədə fikir mübadiləsi aparmış, viktorinanın suallarını cavablandırmışlar.
Məryam Qulammirzəyeva öz təqdimatında bütün gənclərə müraciət edərək müasir dövrdə bəşəriyyəti narahat edən qlobal ekoloji problemlərin həlli istiqamətində birgə səylərin əhəmiyyətini vurğulamışdır. Ekoklub üzvləri Təhsil Nazirliyi Respublika Uşaq-Gənclər İnkişaf Mərkəzinin diplomları və hədiyyələrlə mükafatlandırılmışlar.
