Şagirdimiz beynəlxalq olimpiadada bürünc medala layiq görüldü
Yeni dərs ili məktəbimiz üçün sevindirici xəbərlə başladı. Belə ki, 5-ci sinif şagirdimiz Ayan Əliyeva “Sərhədsiz riyaziyyat” VI Beynəlxalq Riyaziyyat olimpiadasında bürünc medala layiq görüldü. Qeyd edək ki, bir çox ölkələrin nümayəndələrinin də iştirak etdiyi bu olimpiada hər il Bolqarıstanda təşkil olunur və şagirdlərimiz bu olimpiadada uğurla iştirak edirlər. Bu il mövcud vəziyyətlə əlaqədar olaraq olimpiada virtual formada keçirildi və bizim Ayan da olimpiadaya qatılaraq, ən yüksək pillələrdən birini qazanmağa müvəffəq oldu. Qeyd edək ki, Ayan Əliyeva dərs əlaçısıdır, peşəkar şahmatla məşğul olur, rəsm çəkməyi xoşlayır. Biz də öz növbəmizdə Ayanı təbrik edir, ona yeni-yeni uğurlar arzulayırıq!
