Xocalı şəhidləri anıldı
Bu gün Respublikanın hər yerində olduğu kimi 126 nömrəli tam orta məktəbdə də Xocalı qətliamının 23-cü ildönümünə həsr olunmuş anım mərasimi keçirilmişdir. Şəhidlərin xatirəsi bir dəqiqəlik sükutla yad edildikdən sonra məktəbin direktoru Şəmsi Qocayev çıxış edərək Xocalıda baş vermiş faciə haqqında ətraflı məlumat verdi. O, qeyd etdi ki, 1992-ci il fevralın 25-dən 26-na keçən gecə ermənistan silahlı qüvvələri SSRİ dövründən Xankəndi (Stepanakert) şəhərində yerləşən 366-cı motoatıcı alayın zirehli texnikası və hərbi heyətinin köməkliyi ilə Xocalı şəhərini işğal etdi. Hücumdan əvvəl, fevralın 25-i axşam şəhər toplardan və ağır artileriyadan şiddətli atəşə tutuldu. Nəticədə, fevralın 26-ı səhər saat 5 radələrində Xocalı tam alova büründü. Mühasirəyə alınan şəhərdə qalmış təqribən 2500 nəfər xocalılı Ağdam rayonunun mərkəzinə çatmaq ümidi ilə şəhəri tərk etdi. Amma bir günün içində yer üzündən silinən şəhəri tərk edən 2500 Xocalı sakinindən 613-ü düşmən gülləsinə tuş gəlib qətliamın qurbanı oldu. Bu soyqırım nəticəsində 63-ü uşaq, 106-ı qadın, 70-i qoca və qarı olmaqla – 613 nəfər Xocalı sakini qətlə yetirildi, 8 ailə tamamilə məhv edildi, 25 uşaq hər iki valideynini, 130 uşaq valideynlərindən birini itirdi. Düşmən gülləsinə tuş gəlib yaralanan 487 nəfərdən 76-sı uşaq idi. 1275 xocalılı əsir, 150 xocalılı itkin düşdü. Dövlətin və əhalinin əmlakına 1 aprel 1992-ci il tarixinə olan qiymətlərlə 5 mlrd. rubl dəyərində ziyan vurulmuşdur. Tədbir şagirdlərin iştirakı ilə hazırlanmış ədəbi-bədii kompozisiya ilə davam etdirilmişdir.Tədbirdən sonra bir qrup müəllim və şagird “Ana fəryadı” abidəsi ziyarət etmiş və soyqırım qurbanlarının xatirəsinə ucaldılmış abidənin önünə gül dəstələri qoymuşdur.
