119 №-Lİ TAM ORTA MƏKTƏB

9 iyul 2024-cü il tarixində D.Cəbrayılov adına 119 nömrəli tam orta məktəbdə ümumi təhsil pilləsində təhsilalanların təhsil haqqında dövlət sənədlərinin nümunələri və onların verilməsi qaydasının 5.1-ci bəndinə müvafiq olaraq məktəbin 9-cu və 11-ci sinfini bitirən məzunlarına ümumi orta və tam orta təhsil haqqında attestatlar təqdim olundu. 

Məzunlarımıza gələcək həyatlarında uğurlar arzu edirik.

Bakı Şəhəri üzrə Təhsil İdarəsi (BŞTİ) tərəfindən paytaxtın təhsil müəssisələrinin iştirakı ilə “Məktəblinin yay mütaliəsi” adlı layihəsinə start verilir.

Layihənin əsas məqsədi şagirdlərin yay tətili günlərində asudə vaxtlarının səmərəli təşkili, mütaliəyə maraqlarının artırılması, kitab mübadiləsi mədəniyyətinin genişləndirilməsi, oxu bacarıqlarının inkişaf etdirilməsi və nitq vərdişlərinin təkmilləşdirilməsindən ibarətdir.

Layihə çərçivəsində paytaxtın təhsil müəssisələri şagirdlərin oxuduğu kitabları əks etdirən fotoşəkilləri, yaxud oxuduqları əsər və onun müəllifi ilə bağlı fikirlərinə dair videogörüntüləri məktəbin sosial şəbəkə hesablarında #məktəblininyaymütaliəsi haşteqi ilə paylaşması nəzərdə tutulur.

Qeyd edək ki, layihə sentyabr ayına qədər davam edəcək.

İyunun 21-də dövlət ümumi təhsil müəssisələrində çalışan təhsilverənlərin sertifikatlaşdırılması prosesinin test imtahanı mərhələsinə başlanılıb.

Qaydalara müvafiq olaraq, test imtahanı ilə bağlı məlumat 15 may tarixində iştirakçıların şəxsi kabinetlərinə göndərilib.

Bakı Şəhəri üzrə Təhsil İdarəsinin tabeliyindəki ümumi təhsil müəssisələrində çalışan 2 379 təhsilverən sertifikatlaşdırma prosesinin test imtahanı mərhələsinə  dəvət olunub.

Məktəbəqədər və Ümumi Təhsil üzrə Dövlət Agentliyinin direktor müavini, Agentliyin Bakı Şəhəri üzrə Təhsil İdarəsinin müdiri vəzifəsini müvəqqəti icra edən Nərminə Hüseynova və BŞTİ-nin müvafiq struktur bölmə rəhbərləri imtahan mərkəzinə gəlib və müəllimlərə öz tövsiyələrini verib, uğurlar arzulayıb.

Qeyd edək ki, test imtahanı mərhələsində 120 dəqiqə müddətində təhsilverənlərin tədris etdiyi fənn üzrə ümumi təhsil proqramlarına, tədris metodikasına və təlim strategiyalarına aid 60 sual təqdim edilir. Hər düzgün cavab 1 balla qiymətləndirilir. Bu mərhələnin nəticələri üzrə balların hesablanması avtomatlaşdırılmış rejimdə proqram təminatı vasitəsilə həyata keçirilir və imtahan başa çatdıqdan dərhal sonra namizədin kompüterinin ekranında görünür.

Nəzərinizə çatdırırıq ki, test imtahanında mümkün 60 baldan minimum 30 bal toplamış təhsilverənlər sertifikatlaşdırmanın müsahibə mərhələsinə iştirak hüququ qazanacaq.

Xatırladaq ki, Nazirlər Kabinetinin 18 avqust 2022-ci il tarixli qərarına əsasən, dövlət ümumi təhsil müəssisələrinin təhsilverənlərinə sertifikatlaşdırmanın nəticəsinə uyğun olaraq tədris edilən dərs saatına görə test imtahanı mərhələsində nəticə göstərənlərin vəzifə maaşlarına əlavələr ediləcək.

Sertifikatlaşdırmada iştirak edən bütün müəllimlərə uğurlar arzulayırıq!

     14 iyun 2024-cü il tarixində  D.Cəbrayılov adına 119 nömrəli tam orta məktəbdə “Son zəng” tədbiri keçirildi. Tədbirdə Türkan qəsəbə nümayəndəliyi, məktəb rəhbərliyi, müəllim-şagird kollektivi, XI siniflərin valideynləri iştirak etdilər. Tədbir açıq elan edildikdən sonra Azərbaycan Respublikasının Dövlət Himni səsləndi. Daha sonra şəhidlərimizin əziz ruhu bir dəqiqəlik sükutla yad edildi. 
İlk olaraq məktəbin direktoru Mətanət Mayılova çıxış edərək bildirdi ki, müstəqil həyata qədəm qoyan hər bir məzun vətəninə layiqli vətəndaş olmağı qarşısına məqsəd qoymalı, öz gələcəyini xoşbəxt qurmalıdır, daha sonra məzunlara bundan sonra qədəm qoyacaqları müstəqil həyatlarında müvəffəqiyyətlər arzuladı. Sinif rəhbərləri, müəllimlər məzunlara xoş arzularını bildirərək onlara gələcək həyatlarında uğurlar arzuladılar.
     Qeyd edək ki, XI sinif üzrə buraxılış imtahanlarından 5 nəfər şagirdimiz, IX siniflər üzrə isə 4 nəfər şagirdimiz 200 baldan yuxarı bal toplamışdır.

 2023-2024-cü tədris ilində pedaqoji fəaliyyətlərində seçilən müəllimlər və tədris ilini müvəffəqiyyətlə başa vuran şagirdlər Fəxri Fərman və Tərifnamələrlə təltif olundu. Tədbir şagirdlərin hazırladıqları ədəbi-bədii kompozisiyalarla davam etdirildi. Tədbirdə simvolik “Bilik açarı” məzunlar tərəfindən X sinif şagirdlərinə təqdim olunub, sonda “Son zəng” çalındı.

   Azərbaycan Respublikası Elm və Təhsil Nazirliyi Bakı Şəhəri üzrə Təhsil İdarəsinin 24.10.2023-cü il tarixli 2-29-59/3-2-387F/2023 nömrəli əmri ilə "7-dən 17-ə vətənpərvər!" layihəsinin həyata keçirilməsi məqsədilə məktəbin ibtidai sinif müəllimi Sevda İsmayılovanın rəhbəri olduğu 2^a  sinif şagirdləri şəhid Məmmədbəyli Natiq Vahid oğlunun ailəsini ziyarət etdilər. Şəhidlərin xatirəsinin əbədiləşdirilməsi və şəhid ailələrinin hörmət və ehtiramla yad edilməsi məqsədilə təşkil olunan ziyarətdə Azərbaycanın bütövlüyü uğrunda canından keçmiş şəhid Natiq Məmmədbəylinin həyatı, döyüş yolu haqqında ətraflı söhbətlər aparılıb məktəblilər tərəfindən şeirlər səsləndirilib.
     Natiq Məmmədbəyli - 29 sentyabr 2020-ci ildə könüllü olaraq Vətən müharibəsinə qatılıb. Füzuli, Cəbrayıl, Zəngilan, Hadrut və Xocavənd istiqamətində gedən döyüşlərdə iştirak edib. 20.10.2020-ci ildə Xocavənd istiqamətində gedən döyüşlərdə qəhrəmancasına şəhid olub.
   Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti İlham Əliyevin Sərəncamına əsasən Natiq Məmmədbəyli ölümündən sonra "Vətən uğrunda", "Xocavəndin azad olunmasına görə" medalları ilə təltif edilib.

   Şəhidlərimizin xatirəsini və adını uca tutmaq, əbədiləşdirmək, onların yaxınlarına, doğmalarına, ailə üzvlərinə diqqət və qayğı göstərmək hər birimizin borcudur.