“Əsrlərin yadigarı – Ana Dilim” adlı tədbir keçirilib
94 nömrəli tam orta məktəbdə Ana dili və ədəbiyyat fənni aylığı çərçivəsində Beynəlxalq Ana Dili Gününə həsr edilmiş “Əsrlərin yadigarı – Ana Dilim” adlı tədbir keçirilib. Tədbirdə məktəbin direktoru Şəmsəddin Vəliyev çıxış edərək bu günün yaranma tarixi, Ümummilli lider Heydər Əliyevin Azərbaycan dilinin inkişafındakı müstəsna xidmətlərindən, onun 2002-ci il sentyabrın 30-da təsdiq etdiyi “Azərbaycan Respublikasında dövlət dili haqqında” Qanundan, bu qanunun Azərbaycan dilinin dövlət dili kimi hüquqi statusunu nizamlamasından danışıb. Ş.Vəliyev qeyd edib ki, Ulu öndər Heydər Əliyevin əsasını qoyduğu dil siyasəti ənənələrini bu gün Prezident İlham Əliyev uğurla davam etdirir.
Tədbirdə çıxış edən məktəbin şagirdləri tarixi şəxsiyyətlərin obrazları vasitəsilə Azərbaycan dilinin keçdiyi ağır tarixi inkişaf yolundan bəhs edib, Ana dilinə həsr olunmuş şeirlər və mahnılar ifa ediblər.
