86 №-li tam orta məktəb

   Azərbaycan Respublikasının Prezidenti İlham Əliyevin sərəncamına əsasən ölkəmizdə 2024-cü il “Yaşıl dünya naminə həmrəylik ili” elan edilib.

   Mübariz Nəcəfov adına 86 nömrəli tam orta məktəbdə biologiya müəllimi Kəmalə Gülməmmədovanın təşəbbüsü ilə “Yaşıl dünya naminə həmrəylik ili”nə əsasən “Breyn Ring” intellektual oyunu keçirilib. 6d, 6e və 6f sinif şagirdləri arasında intellektual oyununun təşkil olunmasında əsas məqsəd şagirdlərin diqqətini ətraf mühit problemlərinə, onların həllinə yönəltmək və gələcəkdə mümkün fəsadların qarşısını almaqda ekoloji təhsilin və bu istiqamətdə maarifləndirmənin vacibliyini vurğulamaqdır. Şagirdlərə ekoloji problemlər, iqlim dəyişiklikləri və onların canlı aləmə mənfi təsirləri, həmçinin ətraf mühitin qorunması istiqamətində görülməli işlər və digər mövzularda suallar verilib. Sonda qalib gələn 6f sinif şagirdlərinin komandası və digər iştirakçılar məktəbin direktoru Cavid Əliyev tərəfindən mükafatlandırılıb.

   2024-cü ildə dahi Azərbaycan şairi və mütəfəkkiri Məhəmməd Füzulinin anadan olmasının 530 ili tamam olur. Bu əlamətdar günlə əlaqədar olaraq Mübariz Nəcəfov adına 86 nömrəli tam orta məktəbin Azərbaycan dili və ədəbiyyat müəllimi Ülviyyə Əsgərovanın təşəbbüsü ilə “Dəyirmi masa” təşkil olunub. Ülviyyə Əsgərova Azərbaycan ədəbi-bədii fikrinin inkişafında müstəsna yer tutan, Yaxın və Orta Şərq ölkələri ədəbiyyatına mühüm təsir göstərən qüdrətli sənətkar Məhəmməd Füzuli haqqında şagirdlərə geniş məlumat verib. Onun parlaq dühasının təcəssümü olan və bu gün də sevilə-sevilə oxunan əsərləri şagirdlərin çıxışları zamanı səsləndirilib.

   Sonda çıxış edən məktəbin direktoru Cavid Əliyev Məhəmməd Füzulinin anadilli poeziyanın mükəmməl nümunələrini yaratdığını, çoxcəhətli bədii-fəlsəfi irsinin Azərbaycan xalqının bəşər mədəniyyəti xəzinəsinə misilsiz mənəvi sərvəti bəxş etdiyini bildirib.

   Ümumtəhsil müəssisələrinin şagirdləri arasında sağlam həyat tərzi və reproduktiv sağlamlıq sahəsində maarifləndirmə işinin aparılması məqsədilə “Ümumtəhsil müəssisələrinin VIII-IX siniflərində reproduktiv sağlamlıq mövzusunda məşğələlər üzrə metodiki vəsait”ə əsasən Mübariz Nəcəfov adına 86 nömrəli tam orta məktəbin şagirdləri ilə “Yeniyetmələrin sirləri” maarifləndirici görüş keçirilib. Görüşün keçirilməsində əsas məqsəd yeniyetmələri şəxsi gigiyena və cinsi yetişkənlik dövründə onların orqanizmində baş verən fizioloji dəyişikliklər mövzusunda maarifləndirməkdir. Şagirdlər qruplara ayrılaraq verilən tapşırığı yerinə yetiriblər. Sonda onları maraqlandıran suallar məktəb psixoloqu Şəfəq Soltanova tərəfindən cavablandırılıb.

   Aprelin 9-da  “Şahin” hərbi-idman oyunun Xətai rayon mərhələsinin qalib komandalarının mükafatlandırılma mərasimi keçirilib. Tədbirdə Xətai Rayon İcra Hakimiyyətinin İctimai-siyasi və humanitar məsələlər şöbəsinin müdiri Pənah İmanov, BŞGİİ-nin Xətai rayonu üzrə gənclər və idman sektorunun müdiri Tural Əhmədov və qalib gələn məktəblərin komandaları, həmçinin onların Hərbi rəhbərləri iştirak ediblər.   “Şahin” hərbi - idman oyunun yekun nəticələrinə əsasən I yeri tutan Humanitar Fənlər Təmayüllü məktəb-liseyin, II yeri tutan 86 saylı tam orta məktəbin, III yeri tutan 263 saylı tam orta məktəbin qalib komandaları kubok və diplomlarla təltif olunublar. Şagirdlərimizi təbrik edir, gələcək fəaliyyətlərində uğurlar arzu edirik.

   Ümumtəhsil müəssisələrinin şagirdləri arasında sağlam həyat tərzi və reproduktiv sağlamlıq, eləcə də erkən və qohumlararası nikahların qarşısının alınması sahəsində maarifləndirmə işinin aparılması məqsədilə “Ümumtəhsil müəssisələrinin VIII-IX siniflərində reproduktiv sağlamlıq mövzusunda məşğələlər üzrə metodiki vəsait”ə əsasən Mübariz Nəcəfov adına 86 nömrəli tam orta məktəbin şagirdləri ilə “Qohum nikahların fəsadları” mövzusunda maarifləndirici seminar keçirilib. Seminarda məktəbin psixoloqu Şəfəq Soltanova, uşaq birliyi təşkilatı rəhbəri Şərqiyyə Əliyeva, həkim Afət Musayeva, tibb bacısı Samirə İbrahimova və şagirdlər iştirak ediblər.

   Afət Musayeva qohum nikahların əsas fəsadının doğulan uşaqlarda genetik xəstəliklərin daha çox müşahidə olunması, həmçinin bu evlilikdən olan uşaqların anadangəlmə qüsurlarla dünyaya gələ bilməsi barədə şagirdlərə geniş məlumat verib.

   Şəfəq Soltanova qohum nikahlarının adətən ailəyə aid var-dövlətin dağılmaması, ailə böyükləri arasındakı bağları qorumaq, qohumların evlilik və sosial-iqtisadi baxışlarının eyni olması səbəblərindən qurulduğunu, lakin bunun gələcəkdə genetik xəstəliklərin artmasına səbəb olacağını çıxışı zamanı bildirib.