Azərbaycan Respublikasının xalq artisti Rasim Balayev ilə görüş keçirildi
Oktyabrın 24-də məktəbin illik Fəaliyyət Planınına uyğun olaraq məktəblilərin mütaliə vərdişlərinin təkmilləşdirilməsi və onlarda mütaliə mədəniyyətinin formalaşdırılması və “İmzalı görüş” layihəsi çərçivəsində şagirdlərin yazıçılar, bədii qiraət ustaları ilə görüşlərinin təşkil məqsədilə Azərbaycan Respublikasının Xalq artisti, Kinematoqrafçılar İttifaqının sədri Azərbaycan Dövlət mükafatı laureatı Rasim Əhməd oğlu Balayevlə görüş keçirildi.
Tədbirin əvvəlində məktəbin Azərbaycan dili və ədəbiyyatı müəllimi Qəndab Quliyeva xalq artisti Rasim Balayevin keçdiyi həyat yolu, rol aldığı filmlərin tarixçəsindən bəhs edib.
Tədbirin maraqlı hissələrindən biri xalq artisti Rasim Balayevin yaratdığı obrazlarla qarşılaşması oldu. Tədbir boyunca şagirdlərimiz tərəfindən görkəmli aktyorun rol aldığı “Nəsimi” filmlərindən səhnəciklər canlandırılıb.
Azərbaycan kinosunun keçdiyi inkişaf yolu barədə məktəblilərə məlumat verən R.Balayev oynadığı ilk rollardan, xalq qəhrəmanı Babək, böyük filosof şair Nəsiminin obrazlarının ona qazandırdığı tamaşaçı sevgisindən danışıb. Qəhrəman obrazını yaratmaq üçün aktyordan tələb olunan keyfiyyətlərindən söz açan Xalq artisti vətənpərvərlik mövzusunda çəkilən filmlərin insanlarda yaratdığı ruh yüksəkliyinə toxunub. R.Balayev Qarabağ Zəfərini qazanan qəhrəman oğullarından bəhs edən mükəmməl ekran əsərlərinin yaranacağına əminliyini ifadə edib.
Yeniyetmə və gənclərə öz tövsiyələrini verən qonaq hansı sənətə, peşəyə yiyələnmələrindən asılı olmayaraq ilk növbədə vətəni sevməyi, ona ləyaqətlə xidmət etməyi arzulayıb, daha sonra dahi aktyor ona ünvanlanmış sualları özünəməxsus tərzdə, ətraflı cavablandırıb. Xalq artisti məktəb kollektivinə tədbirin təşkilinə görə öz minnətdarlığını bildirib.
Tədbirdə eyni zamanda məktəbimizin direktoru Şəfəq İbişova və şəhid ailələri iştirak etdilər. Sonda çıxış edən məktəbin direktoru Şəfəq İbişova şagirdlərdə mütaliəyə marağın artırılmasında bu cür tədbirlərin böyük rolu olduğunu vurğuladı və bu tədbirdə iştirak dəvətini qəbul edib gələn dəyərli qonağımız Xalq artisti Rasim Balayev və şəhid ailələrinə təşəkkür etdi.
