Məktəbimizin şəhid məzunu Elzar Yusubov Süleyman oğlu yad edildi
Azərbaycan Respublikası Təhsil Nazirliyinin 16.11.2020-ci il tarixli, F-512 nömrəli əmri ilə təsdiq olunmuş "Azərbaycan xalqının tarixi qələbəsinin tədrisdə əks etdirilməsi haqqında" Təhsil Nazirliyinin 2020/2021-ci tədris ili üçün Fəaliyyət Planına uyğun olaraq Şəhidlərimizin unudulmaması üçün adları əbədiləşdirilir, xatirə lövhələri vurulur, anım tədbirləri keçirilməkdə davam edir.
Martın 11-də məktəbin direktoru Nəsimi Quliyev və informatika müəllimi Rüfanə Əliyevanın təşkilatçılığı ilə 5"A" sinfində sinif saatı keçirilərək məktəbimizin şəhid məzunu Elzar Yusubov Süleyman oğlu yad edildi və həmin sinfə şəhidin adı verildi.
Məktəbin rəhbərliyi şəhidin ailəsinə ziyarət zamanı bildirdi ki, hər bir şəhid ailəsi bizim üçün əzizdir. Onların yanında olmaq bizə mənəvi güc verir. Şəhid ailələrinə diqqət göstərmək hər birimizin mənəvi borcudur. Daha sonra şəhidin ailəsi ilə bərabər bir qrup şagird şəhidin məzarını ziyarət etdi.
