Sinif təşkilat saatı keçirildi
Azərbaycan Respublikası Təhsil Nazirliyinin 16.11.2020-ci il tarixli, F-512 nömrəli əmri ilə təsdiq olunmuş "Azərbaycan xalqının tarixi qələbəsinin tədrisdə əks etdirilməsi haqqında" Təhsil Nazirliyinin 2020/2021-ci tədris ili üçün Fəaliyyət Planına uyğun olaraq məktəbimizdə nümunəvi siniflərə şəhidlərin adları verilməkdədi. Fevralın 18-də məktəbimizin şəhid məzunu Eissavi Muhamməd Mazen oğlu doğum günündə yad edildi və rus dili ədəbiyyat müəllimi Yelena Arslanovanın sinif rəhbəri olduğu 6”D” sinfinə şəhidin adı verildi. Bu məqsədlə 6”D” sinfində sinif saatı keçirildi, daha sonra bir qrup şagird Yelena Arslanovanın rəhbərliyi ilə şəhidin məzarını ziyarət etdi. 19 yaşlı Eissavi Muhamməd Ağdam ətrafındakı döyüşlərdə canını vətənə qurban verdi.
Azadlıq, müstəqillik, qəhrəmanlıq simvolumuza çevrilən Muhammədin timsalında bütün Şəhidlərimiz hər zaman qəlbimizdə əbədi yaşayacaqdır.
Qeyd edək ki, Şəhidimiz Eissavi Muhamməd ölümündən sonra Azərbaycan Respublikası Prezidentinin müvafiq Sərəncamları ilə Azərbaycan Respublikasının ərazi bütövlüyünün təmin edilməsi uğrunda döyüş əməliyyatlarında iştirak etmiş və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə “Vətən uğrunda” medalı, Azərbaycan Respublikasının Xocavənd rayonunun işğaldan azad edilməsi uğrunda aparılmış döyüş əməliyyatlarında iştirak edərək şəxsi igidlik və şücaət nümayiş etdirdiyinə görə “Xocavəndin azad olunmasına görə” medalı ilə təltif edilmişdir.
Ruhun şad, məkanın cənnət olsun, igid Vətən oğlu!.
