HÖRMƏTLİ VALİDEYNLƏR VƏ ƏZİZ ŞAGİRDLƏR!
Azərbaycan Respublikası Elm və Təhsil Nazirliyinin məktəbli forması ilə bağlı müəyyən etdiyi qaydalara uyğun olaraq, 2025–2026-cı tədris ilində məktəbli formasının əsas prinsipləri dəyişməz olaraq qalacaqdır. Məktəbimizin bütün şagirdləri dərs prosesinə yalnız təsdiq edilmiş və rəsmi məktəbli formasında gəlməlidirlər. Məktəbli forması təkcə geyim deyil, həm də məktəbimizin vahidliyinin, intizamının və təhsil mühitimizin keyfiyyətinin qorunmasının vacib amilidir. Bu forma şagirdlərimizin məktəb daxilində nümunəvi və səliqəli görünməsini təmin etməklə yanaşı, onların mənəvi tərbiyəsində də mühüm rol oynayır.
✅️Hər bir şagird məktəbə gələn zaman formasının təmiz, ütülü və səliqəli olmasına xüsusi diqqət yetirməli, geyim qaydalarına tam şəkildə riayət etməlidir.
✅️Məktəbli formasının qorunması və istifadəsi ilə bağlı aşağıdakı ciddi tələblər bütün şagirdlər üçün mütləqdir:
1. Məktəb formasına aid olmayan, xüsusilə cins şalvarlar, idman üslublu paltarlar və rəngarəng, qeyri-formal geyimlərin geyilməsi qəti şəkildə qadağandır. Məktəbli formasının standartlarına uyğun olmayan hər hansı geyim məktəb nizam-intizamına zidd hesab olunacaqdır.
