17 noyabr dövlətimiz və xalqımız tərəfindən “Milli Dirçəliş Günü” kimi qeyd edilir
1988-ci il noyabrın 17-də xalq Bakı şəhərində Azadlıq meydanına axışmaqla 70 il Azərbaycanı müstəmləkə əsarətində saxlayan Sovet imperiyasına qarşı ilk kütləvi etiraz səsini qaldırdı. Azərbaycanın işğal edilmiş Dağlıq Qarabağ Muxtar Vilayətində başlamış erməni separatizmini və terrorunu dəstəkləyən, ermənilərin Azərbaycana qarşı torpaq iddialarına rəvac verən, Azərbaycan xalqının hüquq və mənafelərini qorumayan bir rejimə qarşı kütləvi xalq hərəkatı məhz 17 noyabrda başlandı. Həmin gün Azərbaycan xalqı bir yumruq kimi sıx birləşərək bütün dünyaya sübut etdi ki, o, azad olmağa layiq xalqdır. Müstəqil Azərbaycanın dövlət səviyyəsində qeyd etdiyi bayramlar içərisində Milli Dirçəliş günü xüsusi yer tutur. Məhz bu səbəblə məktəbimizdə 7-ci sinif şagirdləri ilə konfrans zalında tədbir təşkil olundu. Tədbir məktəbin tərbiyə işləri üzrə direktor müavini Quliyeva Aidə və tarix müəllimi Ağayeva Yeganə tərəfindən təşkil olunmuşdu. Himnimizin səsləndirilməsi ilə başlayan tədbirdə iştirak edən şagirdlər bu gün münasibəti ilə hazırladıqları videotəqdimatları, şəkilləri, çıxışları nümayiş etdirdi, şeirlər söylədilər.
