Şanlı qələbə ilə tarix yazmış Azərbaycan xalqı
Prezident İlham Əliyev 25 fevral tarixində Bakının Ramana qəsəbəsindəki yaşayış kompleksində şəhid ailələri və müharibə əlillərinə mənzillərin təqdim olunması mərasimindəki çıxışı zamanı bir çox vacib məqamlara toxunmuş, ölkədə bugünə qədər aparılan sosial siyasətlə bağlı açıqlamalar vermiş və müharibənin Azərbaycan üçün qaçılmaz variant olduğunu bildirmişdir. Ölkə başçısının nitqində toxunduğu məsələlərdən biri də Ermənistandakı mövcud ictimai-siyasi vəziyyətlə bağlı olmuşdur.
...1994-cü il atəşkəs dövründən başlayaraq münaqişənin dinc yolla həlli üçün Azərbaycan dövləti əlindən gələni etdi. Dəfələrlə sülh yolu ilə, qan tökülmədən bu problemi həll etmək istəyimiz bütün rəsmi tribunalardan bəyan edildi. Lakin Ermənistanın hərbi-siyasi rəhbərliyi işğalçı ölkə olduğunu, sülh prosesinə həmişə biganə qaldığını nümayiş etdirirdi. Cəbhə xəttində demək olar ki, erməni silahlı qüvvələri hər gün atəşkəsi pozur, təxribatçılıqla məşğul olurdular. Çox təəssüf ki, təcavüzkar erməni faşistlərinə 2016-ci ilin Aprel döyüşlərindən də ibrət dərsi götürmədi. İkinci Qarabağ müharibəsinin başlanmasının məsuliyyəti də Ermənistanın üzərinə düşür. 2020-ci ilin iyul ayında və sentyabrın 27-də yenə də düşmən cəbhə xəttində təxribat törətdi. Ali Baş Komandanın rəhbərliyi altında Azərbaycanın Müzəffər Ordusu əks hücüm əməliyyatlarına başladı.
Müharibənin başladığı ilk gündən etibarən siyasi əqidəsindən asılı olmayaraq hər kəsin vahid amal naminə birləşməsi isə güclü xalq olduğumuzu bir daha təsdiq etdi. Bütün dünya Azərbaycan dövlətinin, xalqının və fərqli ölkələrdə yaşayan dünya azərbaycanlılarının gücünü, əzəmətini bir daha gördü. Lakin müharibənin öz qanunları var. Ordu ordu ilə savaşar, əsgər əsgər ilə döyüşər - üz-üzə, mərd-mərdanə. Əfsus ki, döyüş meydanında ordumuza məğlub olan Ermənistan bu qanunları da pozdu, müharibə cinayətləri törədərək, şəhər və kəndlərimizi, dinc əhalini atəşə tutdu. Düşmənin xain hücumları nəticəsində çox sayda mülki şəxs, o cümlədən uşaqlar, qadınlar həlak olub və yaralanıb, evlər, çoxmənzilli yaşayış binaları, obyektlər dağıldı... Düşmənin bu təxribatları, xain hücumları qələbə əzmi ilə döyüşən milli ordumuzun iradəsini qıra bilmədi.
Çox qısa bir zamanda, 44 gün ərzində güclü, müasir silahlarla silahlanmış, xalqın güclü dəstəyini görən müzəffə ordumuzun əsgər və zabitləri əsl şücaət, qəhrəmanlıq göstərərək torpaqlarımızı işğaldan azad etdilər və nəhayət Ermənistan hərbi-siyasi rəhbərliyi rüsvayçılıqla təslim olmağa məcbur oldu. Prezident İlham Əliyevin sərəncamı ilə təsis edilmiş 8 noyabr Zəfər Günü çoxəsrlik Azərbaycan tarixinə qızıl hərflərlə yazılmış parlaq hadisədir. Bu, Ali Baş Komandan İlham Əliyevin, xalqımızın və rəşadətli Ordumuzun qazandığı böyük tarixi Zəfərdir. Bu tarixi qələbə ilə Azərbaycan bütün dünyaya öz gücünü bir daha göstərdi.
Müharibə Azərbaycan Ordusunun gücünü göstərməklə yanaşı, eyni zamanda Ermənistan ordusundakı bütün çatışmazlıqları ortaya çıxartdı və illərdir yaradılan mifi darmadağın etdi. Bu gün erməni xalqı arasında Ermənistan ordusuna olan inamı sıfıra enib. Azərbaycan Ordusunda isə ölkə başçısının da dəfələrlə dediyi kimi, müharibə dövründə bir nəfər belə fərari yox idi. Əksinə, ordu sıralarına könüllü olaraq qoşulmaq istəyən gənclər Səfərbərlik xidmətlərinin qarşısında daim hazır vəziyyətdə gözləyirdilər. Könüllülərin sayı o qədər çoxluq təşkil etmişdi ki, səfərbərlik xidmətlərində ehtiyac olduğu halda dövlət səviyyəsində qərar veriləcəyi xalqa bildirilirdi.
Bu məqamda ölkəmizin bütün ümumtəhsil məktəblərinin vətənpərvərlik tərbiyəsində xüsusi rolunu qeyd etmək istəyirəm. Vətən müharibəsində mətinliklə döyüşən gənclərimizin əksəriyyəti bir neçə il əvvəlin məktəb məzunları idi. Müəllimlərimizin şagirdlərə dövlət və dövlətçilik rəmzlərinə hörmət, sədaqət və ehtiram hissinin aşılanması vətənpərvər gəncliyin formalaşması baxımından şübhəsiz ki, çox faydalı olmuşdur. Tarixi Qələbəmiz gənclərimizdə Vətənə olan sevgisi bir daha artırdı.
Bəli, 2020-ci ilin 10 noyabr günü Azərbaycan tarixinə qızıl hərflərlə yazılmış bir tarixdir. Həmin gün haqq-ədalətin qalib gəldiyi, xeyrin şər üzərində qələbə çaldığı gündür. Azərbaycan xalqı - böyükdən kiçiyə kimi, bu tarixi qələbə gününü 30 ilə yaxın idi ki, gözləyirdi.
Biz qalibik! Ali Baş Komandanmiz başda olmaqla şanlı QƏLƏBƏMİZLƏ tarix yazan Azərbaycan xalqıyıq.
Yaşasın Ali Baş Komandan! Yaşasın Milli Ordumuz! Yaşasın Azərbaycan xalqı!
.......
Bakı şəhəri, Nəsimi rayonu,
Ağabəy Novruzbəyli adına 46 nömrəli tam orta məktəbin
direktoru Budaqova Sevinc Budaq qızı