39 №-Lİ TAM ORTA MƏKTƏB

Azərbaycan Respublikası Elm və Təhsil Nazirliyi tərəfindən Ekspo Mərkəzində Dahi Azərbaycan şairi Məhəmməd Füzulinin 530 illik yubileyinə həsr olunmuş X Bakı Beynəlxalq Kitab Sərgisi təşkil edildi. Sərgidə məktəbimizin direktoru Tahirə Şükürova, dərnək rəhbəri Mətanət Rzayeva və 8 "A" sinif şagirdləri Sevil Nağıyeva ilə birlikdə iştirak etdilər.

2024-2025-ci il tədris ilində məktəbimiz yeni "Şagird davranış qaydaları" pilot layihəsinə qoşulmuşdur.Bu münasibətlə şagirdlərlə görüş keçirildi. İclasda məktəb rəhbərliyi və direktor müavinləri yeni şagird qaydalarının müddəaları, qayda pozuntularının səviyyələri, bu ildən siniflərdə tətbiq olunan şagird davranış jurnalları və qaydaların digər bəndləri ilə yaxından tanış etdilər. Onu da qeyd etdilər ki, jurnalda təkcə qayda pozuntusu olan şagirdlər haqqında yazılmayacaq, eyni zamanda il ərzində 3 dəfə nümunəvi davranışa malik olan, akademik bilik səviyyəsi yüksək olan, sosial məsuliyyəti yüksək olan şagirdlər də məktəb rəhbərliyi tərəfindən Fəxri fərmanla təltif olunacaq.

Oktyabrın 1-də dövlət ümumi təhsil müəssisələrindəki məktəbəhazırlıq qruplarında məşğələlərə start verilib.

2024-2025-ci tədris ilində Bakı Şəhəri üzrə Təhsil İdarəsinin tabeliyindəki 287 ümumi təhsil müəssisəsinin məktəbəhazırlıq qruplarına 23 438  uşaq qeydiyyatdan keçib.

Qeyd edək ki, dövlət ümumi təhsil məktəblərində yaradılan məktəbəhazırlıq qruplarında həftədə 4 gün olmaqla 12 məşğələ keçirilir. Məktəbəhazırlıq qruplarında dərs məşğələləri “Ətraf aləmlə tanışlıq”, “Savad təliminə hazırlıq və nitq inkişafı”, “Bədii təfəkkürün inkişafı”, “Məntiqi və riyazi təfəkkürün inkişafı”, “Təsviri fəaliyyət”, “Musiqi” və “Fiziki mədəniyyət”dən ibarətdir.

Onu da qeyd edək ki, məktəbhazırlıq qruplarının yaradılmasında məqsəd 5 yaşlı uşaqların hazırlığı ilə əlaqədar psixoloji dayanıqlığını artırmaq, təhsil mühitinə uyğunlaşdırmaq, onların ünsiyyət və birgə fəaliyyət bacarıqlarına yiyələnməsini təmin etməkdən ibarətdir.

Bu gündən məktəbimizdə 2024-2025-ci tədris ili üzrə 0 “A” (sinif müəllimi Adilə Bədəlova), 0 “B” (sinif müəllimi Sevər Orucova) və 0 Ç (sinif müəllimi Yeganə İbrahimova) məktəbəhazırlıq qruplarında məşğələlər başlayıb. İlk dərs günündə çıxış edən məktəbin direktoru Tahirə Şükürova ilk dəfə məktəbə qədəm qoyan balaca fidanları və onların valideynlərini salamlayıb. Uşaqlar böyük sevinc və həyəcanla sinif otaqlarına daxil olub, yazı masasının arxasında əyləşiblər. Müəllimlər yeni şagirdləri ilə tanış olub, onlara hədiyyələr təqdim ediblər. Sonra uşaqlar müxtəlif oyunlar oynayıb, rəngləmələr işləyiblər. Qeyd edək ki, məktəbəhazırlıq uşaqlarda oxumaq həvəsini, onların məktəbə müsbət emosional münasibətinin formalaşdırılmasını, məktəbə müvəffəqiyyətlə adaptasiya olunması üçün onlarda şəxsi-sosial xüsusiyyətlərin formalaşdırılmasını və birinci sinfə adaptasiyasını təmin edir.

Oktyabr ayının 1-də məktəbin musiqi müəllimi Çinarə Cəfərli tərəfindən III “B” sinif şagirdləri ilə 1 Oktyabr-Beynəlxalq Musiqi Günü qeyd olunub. Dərsin keçirilməsinin məqsədi Beynəlxaq Musiqi Gününü qeyd etmək, şagirdlərə beynəlxalq və milli musiqi, o cümlədən bəstəkarlar haqqında məlumat vermək, onların musiqiyə olan meyil və maraqlarını daha da artırmaqdan ibarət olub. Əvvəlcə Çinarə müəllimə Beynəlxalq Musiqi Gününün təsis olunması, “Azərbaycan klassik musiqisinin atası”, dahi bəstəkar Üzeyir Hacıbəyli, Fikrət Əmirov və musiqi alətləri haqqında məlumat verib. Sonra şagirdlər F. Əmirovun “Şur” simfonik muğamını dinləyiblər.

Şagirdlər bəstəkarlar, milli və xarici musiqilər haqqında bildiklərini sinif yoldaşları ilə bölüşüblər.