290 №-li tam orta məktəb

             “ İnsan hüquqları aylığı” çərçivəsində bu gün də siniflərdə maarifləndirici söhbətlər aparıldı, dərslər “Şagirdlərin hüquqları və vəzifələri “ mövzusuna həsr olundu.  Şagirdlərə insan hüquqlarının tarixi inkişafı, əsas prinsipləri, uşaq hüquqları və bu hüquqların gündəlik həyatdakı əhəmiyyəti barədə geniş məlumat verildi.Bu cür tədbirlərin keçirilməsində əsas məqsəd insan hüquqlarını şagirdlər arasında təbliğ etmək, eləcə də cəmiyyətdə insan ləyaqətinə hörmətin, insan hüquqlarına əməl olunmasının zəruriliyini önə çəkməklə şagirdlərdə humanizm keyfiyyətlərini formalaşdırmaqdan ibarətdir.

             “ İnsan hüquqları aylığı “ çərçivəsində siniflərdə  təşkilat saatları keçirildi.Şagirdlər uşaq hüquqları ilə bağlı bildiklərini yada salaraq nümayiş olunan slaydlarda hüquq pozuntularına münasibət bildirdilər. Dünyanın müxtəlif yerlərindən olan uşaqların hüquqlarının necə pozulduğunu fotoşəkillər vasitəsilə diqqətlə izləyən şagirdlər bu halların qarşısını almaq üçün çıxış yolları üzərində müzakirələr apardılar.

              Azərbaycan poeziyası tarixində özünəməxsus yeri və mövqeyi ilə seçilən Bəxtiyar Vahabzadə zəngin və rəngarəng poetik dünyası ilə yaratdığı söz mülkündə ustad bir şair kimi müdriklik zirvəsinə yüksəldi. Yaradıcılığa şeirlə başlayan, sonralar poema və dram əsərlərinin müəllifinə çevrilən şair zamanın girdabında mücadilədən dönmədi. Haqq səsi ucaldı, mətinliyi ilə seçildi və misralardan süzülən od-alovlu fikiri milyonlarla insanın fikir dünyasına əxz olundu. Prezident İlham Əliyevin “Bəxtiyar Vahabzadənin 100 illik yubileyinin qeyd edilməsi haqqında” 21 fevral 2025-ci il tarixli Sərəncamına əsasən bu gün məktəb kitabxanasında dəyirmi masa keçirildi.Tədbirdə kitabxana müdiri Yaqut Baxşəliyeva şairin yaradıcılığı barədə danışdı. O qeyd etdi ki, Bəxtiyar Vahabzadə ana dilinin qorunması, onun saflığının saxlanılması üçün bütün insanları - azərbaycanlıları anasına hörmət etdiyi tək, ana dilinə də belə məhəbbət və ehtiramla yanaşmağa səsləyirdi. Tədbirin sonunda şagirdlərin ifasında şairin şeirləri səsləndirildi.

            Ənənəvi olaraq bu il də Azərbaycan Respublikasının İnsan Hüquqları üzrə müvəkkilinin təşəbbüsü ilə mayın 18-dən iyunun 18-dək respublikamızda “İnsan Hüquqları aylığı” elan edilmişdir.Bununla əlaqədar şagirdlərə divar qəzetləri hazırlamaq tövsiyə olundu. Şagirdlərin bu mövzuda qəzetlər hazırlaması həm onların mövzuya olan marağını artırır, həm də yaradıcılıq qabiliyyətlərini inkişaf etdirir.Bu gün həmin qəzetlər nümayiş etdirildi. Şagirdlərin əl işləri insan hüquqlarının əhəmiyyətini anlamağa və geniş kütləyə çatdırmağa xidmət edirdi.

             1 İyun Uşaqların Beynəlxalq Müdafiəsi Günüdür. Bu gün bütün dünyada qeyd olunur və uşaq hüquqlarını qorumaq, onların rifahını təmin etmək məqsədi ilə təşkil olunur. 
             Gələcəyimiz olan uşaqların asudə vaxtlarının səmərəli və maraqlı təşkili məqsədilə məktəbdə bayram tədbiri keçirildi. Bayram tədbirində şagirdlərin  ifasında rəngarəng rəqslər, kompozisiyalar nümayiş etdirildi, müxtəlif musiqilər səsləndirildi. İdmanın müxtəlif növləri üzrə nömrələr göstərildi, gənc şahmatçılar mübarizəyə qoşularaq yarışdılar.Gənc rəssamların asfalt və kətan üzərində çəkdikləri rəsmlər xüsusi maraqla qarşılandı. Tədbirin sonunda həm V siniflər arasında tarix fənni üzrə keçirilən bilik yarışında iştirak edən komandalar , həm də bayram tədbirində fəallıq göstərən şagirdlər məktəb rəhbərliyi tərəfindən diplomlarla təltif olundular.