Məqsədimiz kitaba dönməkdir
Nəsimi rayonu A. Rəhimov adına 247 №-li tam orta məktəbdə Azərbaycan Xalq Cümhuriyyətinin 100-cü ildönümü ilə əlaqədar həyata keçirilən silsilə tədbirlərdən biri də 22 may tarixində "Azərkitab" Kitab Təbliğatı Mərkəzində reallaşıb. Məktəbin 7”A” sinif şagirdləri məktəbin Azərbaycan dili və ədəbiyyatı müəllimi Gülnar Səfərəliyeva və sinif rəhbəri Püstə Quliyevanın rəhbərliyi ilə bu gözəl məkana səfər ediblər.
“Məqsədimiz kitaba dönməkdir” devizi altında fəaliyyətə başlayan bu kitab mərkəzi şagirdlərin həddən artıq marağına səbəb olub. Uşaqlar mərkəzlə yaxından tanış olublar, xeyli kitab və aksesuarlar əldə ediblər. Sonda kitab mərkəzinin konfrans zalında toplaşan şagirdlərlə mərkəzin əməkdaşları fikir mübadiləsinə qoşulublar. Mərkəzin fəaliyyəti barədə geniş məlumat alıblar.
Azərkitabda keçirilmiş bu görüş şagirdlərin yaddaşında gözəl bir məkan kimi yer alıb və onlar kitaba dönüşün insan həyatında oynadığı mühüm rolu bir daha anlamış olublar.