28 May – Respublika günü
27.05.2016-cı il tarixində T.Məmmədov adına 239 № li tam orta məktəbdə “28 may- Respublika günü” mövzusunda geniş tədbir keçirilmişdir. Tədbirdə Badamdar bələdiyyəsinin rəhbərliyi, veteranlar, məktəb rəhbərliyi, valideyinlər, Badamdar ictimaiyyətinin digər nümayəndələri yaxından iştirak etmişlər.Tədbiri məktəbin gənc müəllimi, Badamdar bələdiyyə üzvü Xədicə Həsənova açaraq, Respublika günü ilə əlaqədar tarixi faktları tədbir iştirakçılarının nəzərinə çatdırmış, Respublikamızın inkişaf tarixindən söhbət açmış və bu yolda Ulu Öndər Heydər Əliyevin əvəzolunmaz xidmətlərini vurğulamışdır. Çıxışına davam edən Xədicə Həsənova müasir dövrdə ölkəmizin bütün sahələrində baş verən inkişafda cənab Prezident İlham Əliyev və ölkəmizin birinci xanımı Mehriban Əliyevanın fəaliyyətlərindən geniş danışmışdır. Daha sonra söz şagirdlərə verilmiş, onlar Respublika günü ilə bağlı təqdimatlarını irəli sürmüşlər. Məktəbdə başlayan tədbir, “Badamdar Şəhidləri” abidəsinin önündə davam etdirilmişdir. Şagirdlər Şəhidlər, Azərbaycanın müstəqilliyi və əldə olunan nailiyətləri ilə bağlı təqdimatlar irəli sürmüş, şeirlər söyləmişlər. Məktəbin 4-cü sinif şagirdlərinin andiçmə mərasimi də tədbir iştirakçılarının böyük marağına səbəb olmuşdur. Daha sonra bütün tədbir iştirakçıları Heydər Əliyev parkına gedərək Ulu Öndərin büstü qarşısına çiçəklər qoymuşlar.Sonda məktəbin direktoru Respublikanın “Əməkdar Müəllimi” Sədaqət Əzimova tədbirin təşkilatçılarına və bütün iştirakçılara rəhbərlik adından minnətdarlığını bildirmişdir.
