120 №-li tam orta məktəb

    Məktəbin IX sinif şagirdləri ilə imtahan həyəcanının dərəcəsini təyin edən diaqnostik iş aparıldı. Məktəbin psixoloqu Dilbər Hüseynova yeniyetmələrə stressin psixoloji, fiziki və emosional əlamətləri, imtahan stressinin səbəbləri haqqında məlumat verdikdən sonra stressin aradan qaldırılması üçün psixoloji texnikalarla tanış etdi. Məşğələ zamanı texnikalardan ən effektiv olan "Nəfəs texnikaları" və "Relaksasiya çalışmaları" şagirdlərlə birgə icra olundu.

    Fənn aylığı çərçivəsində 120 nömrəli tam orta məktəbin 1B sinfində "Fəsillər" mövzusunda sinif saatı təşkil olundu. Sinif saatında şagirdlər fəsillərin xüsusiyyətlərini qeyd etdilər. Mövzu ilə bağlı tapmaca, şeir söylədilər. Fəsillərə aid şəkilləri rənglədilər. Sonda "Fəsillər" mahnısı ifa olundu.

    Fənn aylığı çərçivəsində mütaliəni vərdişə çevirək layihəsi əsasında bu gün 4b sinif şagirdləri ilə "Polyanna" əsərinin müzakirəsi keçirildi. Tədbirdə müəllimlər və məktəbin kitabxanaçıları iştirak etdilər. Tədbir Eleanor Potterin haqqında video çarx nünayişi ilə başladı. Daha sonra əsərin obrazları sinif rəhbərinin iştirakı ilə müzakirə olundu. Şagirdlər əsər əsasında kiçik bir səhnəcik göstərdilər. İştirak edən müəllimlər öz arzu və təkliflərini şagirdlərə bildirdilər. Sonda sinif rəhbəri mütaliəyə çox həvəsi olan şagirdləri elə həmin əsərin kitabı ilə mükafatlandırdı.

    Məktəbin 9-cu sinif şagirdləri ilə 21 aprel 2024-cü il tarixdə keçiriləcək Buraxılış imtahanı ilə bağlı söhbət aparılmışdır. Tədbirin təşkil olunmasında məqsəd 9-cu sinif şagirdlərində buraxılış imtahanı zamanı psixoloji hazırlığı gücləndirmək, imtahanda davranış normaları ilə tanış etmək, cavab kartının kodlaşdırılması ilə bağlı məsələləri diqqətə çatdırmaq, həmçinin şagirdləri 9-cu sinif Buraxılış imtahanında yüksək nəticə göstərməyə stimullaşdırmaq olmuşdur. Tədbir zamanı şagirdlərin sualları cavablandırılmış, onlarda imtahana həssas münasibət olduğu müşahidə edilmişdir. Tədbirdə təlim-tərbiyə işləri üzrə direktor müavini ilə yanaşı məktəbin yüksək nəticə göstərmiş bir neçə nəfər 10-cu və 11-ci sinif şagirdləri də iştirak etmişdirlər. Onlar 9-cu sinif Buraxılış imtahanının əhəmiyyətindən danışmış və topladıqları yüksək balın gələcək təhsil hədəflərində rolundan danışmışdırlar.

        Məktəbin 10c sinfində tədris proqramı üzrə M.F.Axundzadənin “Hekayəti - Müsyo Jordan həkimi-nəbatat və Dərviş Məstəli şah cadukuni-məşhur” komediyasının məzmunu üzrə işi həm də bir kino baxışına çevirdik. Şagirdlər üçün həm öyrədici, həm də müəyyən qədər əyləndirici mühitin yaradılması dərsə marağı az olanları da prosesə qatdı. Sual-cavab və rollu oyun mərhələsindəki fəallıq əsərin məzmununun tam şəkildə mənimsənildiyini təsdiq etdi. Sonda şagirdlər Nazilə müəllimə öz məmnunluqlarını ifadə etdilər.