Yaqubov Nüsrət İsmayıl oğlu
Azadlıq bəxş edilmir, qan bahasına alınır. Hər xalq öz azadlığı, müstəqilliyi ödədiyi qan bahası ilə dəyərləndirir. Bu baxımdan Azərbaycan xalqı üçün də azadlıq Allahın ən qiymətli nemətidir. Çünki igid oğul və qızlarımız vətəni azadlıq nuruna qərq etməkçün, cəsarətlə, şücaətlə döyüş meydanına atıldılar,sinələrini güllə qabağına verməkdən qorxmadılar. Şəhidlik zirvəsinə yüksələrək, xalqımız üçün dəyanət qürur abidəsinə çevrildilər. Müstəqilliyimizin ilk illərində canlarını Vətənə fəda edən igid oğul və qızlarımız doğma Azərbaycanımızın müstəqilliyinə öz qanları ilə imza ataraq, müqəddəs Şəhidlik Zirvəsini fəth etdilər. Şəhidi olmayan xalq torpaq məhəbbətindən, yurd sevgisindən məhrumdur. Şəhidi olmayan xalqın mənliyi, kimliyi bilinməz, azadlığı qanı ilə, canı ilə qazanmayan xalq hər vaxt kölə kimi gözüqıpıq, həyacan içində yaşayar. Bu baxımdan bizim qəsəbə sakinləri də, bütün Azərbaycan xalqı kimi ağır günlərdə meydana atıldılar, qapıdalında gizlənmədilər,əzmlə, cəsarətlə vətənin azadlığının, bütövlüyünün müdafiəsinə qalxdılar. Qanlı yanvar gecəsi zirəli gənclər də daxil olmaqla Əzizbəyov rayonunun vətənpərvərləri rayonun ərazisində, indiki “Xaşaxana” deyilən yaşayış məntəqəsindəki Hərbi hissənin qarşısını kəsmiş, təyyarələrdən enən hərbi qüvvələrin Bakı şəhərinə getməsinin qarşısını almaq istəmişdilər. Lakin Rus ordusunun ağır texnikasının qarşısını əliyalın halda almaq təbii ki, mümkünsüz idi və hərbiçilərlə yerli əhali arasında yaranmış toqquşma çox qanlı olaylarla nəticələnmiş, çoxlu igid oğullarımız yaralanmış, şəhid olmuşdular. Zirənin igid oğlu Nüsrət Yaqubov məhz həmin hadisələr zamanı ağır güllə yarası almış, vəfalı yoldaşları onu çətinliklə də olsa,Mərdəkan qəsəbəsindəki 26 saylı xəstəxananın cərrahiyyə şöbəsinə çatdıra bilmişdilər. Lakin həddən artıq qan itirdiyindən və rus qaniçənlərinin zəhərli gülləsinə tuş gəldiyindən onu xilas etmək mümkün olmamamış, Nüsrət yanvarın 22-də səhər tezdən xəstəxanada vəfat etmişdi. Nüsrət Yaqubov Azərbaycanın milli Azadlıq hərəkatında Zirə qəsəbəsinin verdiyi ilk şəhid kimi tarixə düşmüşdü. Lakin onun şücaəti,cəsarəti həmkəndlilərinin yadından çıxmamış, indinin özünə qədər onun adı daima böyük hörmətlə yad edilir. Nüsrətin orta təhsil aldığı məktəbimiz hal-hazırda onun adını daşıyır və məktəbimizin həyətində onun büstü ucaldılıb. Allah bütün şəhidlərimizə rəhmət etsin !