Dövlət Bayrağı Günü
Məktəbdə 9 noyabr - Dövlət Bayrağı Günü ilə bağlı silsilə tədbirlər həyata keçirilir. Dövlət Bayrağı Gününə həsr olunmuş bayram tədbirlərindən biri də, noyabrın 7 - də məktəbin ibtidai sinif müəllmi Dilbər Məmmədovanın təşkilatçılığı ilə keçirildi. Tədbirdə məktəbin ibtidai siniflər üzrə təlim - tərbiyə işləri üzrə direktor müavini Şəfiqə Əlizadə, tərbiyə işləri üzrə direktor müavini Anar Miriyev və ibtidai siniflər üzrə metodbirləşmə sədri Mehriban Hüseynova iştirak etdilər.
Bayram tədbiri "Koroğlu" üvertürasının sədaları altında üçrəngli Azərbaycan bayrağının sinif otağına gətirilməsi ilə başladı. Ardınca 2"D" sinif şagirdlərinin ifasında Azərbaycan Respublikasının Dövlət Himni səsləndirildi və Azərbaycanın dövlət müstəqilliyi uğrunda canından keçən şəhidlərin ruhu bir dəqiqəlik sükutla yad edildi. Dilbər müəllimə Azərbaycanın dövlət müstəqilliyinin tarixi, müstəqillik əldə etməsində böyük xidmətləri olmuş, Azərbaycanı çətin günlərdən xilas etmiş, dahi şəxsiyyət Heydər Əlirza oğlu Əliyevin göstərdiyi xidmətlərdən, Dövlət Bayrağı Gününün dövlət səviyyəsində qeyd edilməsindən və bayrağın dövlətin bütövlük, müstəqillik, yenilməzlik, ucalıq, bir sözlə, müqəddəslik rəmzi olduğunu vurğuladı.
Tədbirin gedişində Bayraq gününə həsr olunmuş videoçarx təqdim olundu. Sonra məktəbin 2-ci sinif şagirdləri vətənpərvərlik ruhunda şeirlər və mahnılar söyləyib, bədii kompozisiya ilə çıxış etdilər.
Sonda çıxış edən tərbiyə işləri üzrə direktor müavini Anar Miriyev tədbirin təşkilinə görə Dilbər müəllimə, şagirdlərə və valideynlərə təşəkkür edərək, Dövlət Bayrağının hər bir Azərbaycan vətəndaşının qürur mənbəyi, müstəqil dövlətimizin isə şərəfi, qüdrəti olduğunu və gənc nəslin vətənpərvərlik ruhunda formalaşmasında böyük rol oynadığını qeyd etdi. Sonda xatirə şəkli çəkilib.
