Son zəng
14 iyun 2019 - cu il tarixdə məktəbin həyətində "Son zəng" tədbiri keçirildi. Tədbirdə məktəbin rəhbərliyi, müəllimlər, şagirdlər və valideynlər iştirak etdilər.
Tədbiri giriş sözü ilə açan məktəbin direktoru Rahim Novruzov "Son zəng" münasibəti ilə bütün məzunları və onların valideynlərini səmimi - qəlbdən təbrik etdi. Ardınca söz tədbirin aparıcılarına verildi, onlar qonaqları salamladılar və son zəng tədbiri XI - lərin ifasında musiqilərin, şeirlərin və rəqslərin səsləndirilməsi ilə davam etdi. Tədbirin davamında məktəbin təlim - tərbiyə işləri uzrə direktor müavini Natəvan Mustafayeva və şagirdlərin bu illər ərzində əziyyətini çəkən müəllimləri çıxış etdilər. Tədbirdə həmçinin Respublika fənn olimpiadasında Azərbaycan dili və ədəbiyyat fənni üzrə məktəbə bürünc medal qazandıran və III qrup üzrə qəbul imtahanında məktəb üzrə ən yüksək nəticə göstərərək 676 bal toplayan məktəbin 11"D" sinif şagirdi Abdullazadə Nəzrinin valideynləri də çıxış etdilər. Onlar övladlarının belə gözəl nəticə əldə etməsində məktəbin və Nəzrinin müəllimlərinin böyük rolu və əziyyəti olduğunu qeyd etdilər.
Tədbirin aparıcıları 2018 - 2019 - cu tədris ilində məktəbin şagirdlərinin beynəlxalq və ölkə daxilində keçirilmiş idman və bilik yarışlarında, eyni zamanda məntiq və Respublika Fənn Olimpiadalarında qazandığı uğurlar barədə də qonaqlara və tədbir iştirakçılarına geniş məlumat verdilər. Qəbul imtahanlarında yüksək bal toplayaraq tələbə adını qazanan məzunlar Fəxri fərman və qiymətli hədiyyələrlə təltif edildilər.
Tədbirin gedişində 4"A" sinif şagirdlərinin ifasında hazırlanmış "Bayraq" rəqsi təqdim edildi. "Son zəng" tədbiri onbirincilərin simvolik olaraq bilik açarını birincilərə təhvil verməsi ilə yekunlaşdı. Tədbirin sonunda ənənəvi olaraq "Son zəng" çalındı və ağ göyərçinlər havaya uçuruldu.
