Mehdi Hüseynzadənin 100 illik yubileyi ilə əlaqədar görülmüş işlər
Azərbaycan Respublikası Təhsil nazirinin 17 iyul 2018 - ci il tarixli fərmanına əsasən Mehdi Hüseynzadənin 100 illik yubileyinin keçirilməsi ilə əlaqədar məktəbdə bir sıra işlər görülmüşdür.
Mehdi Hüseynzadənin keçdiyi şərəfli ömür yolunu və qəhrəmanlığını əks etdirən "Uzaq sahillərdə" filmi nümayiş etdirilmiş və şagirdlərlə filmin müzakirəsi aparılmışdır. Bundan başqa məktəbin riyaziyyat - informatika təmayüllü "7 d" sinfində Azərbaycan dili və ədəbiyyat fənn müəllimi Ofelya Mirzəmmədovanın təşkilatçılığı ilə Mehdi Hüseynzadənin həyatı, hərbi fəaliyyəti və II Dünya müharibəsi dövründə göstərdiyi qəhrəmanlıqlardan bəhs edən tədbir keçirilmişdir. Tədbirdə məktəbin direktoru Rahim Novruzov, təşkilatçı Qızılgül Bağıyeva, UBR Ətlas Rəhimova, tarix və ədəbiyyat fənn müəllimləri, həmçinin məktəbin VII - VIII sinifləri iştirak etdilər.
Tədbir Azərbaycan respublikasının Dövlət Himninin səsləndirilməsi ilə başladı. Tədbir aparıcıları Mehdi Hüseynzadənin həyatı və onun fəaliyyəti haqqında geniş məlumat verdilər. Şagirdlər qəhrəmanın keçdiyi şərəfli ömür yoluna aid yazılmış şeirlər səsləndirdilər. Eyni zamanda şagirdlərin ifasında vətənpərvərlik mövzusunda yazılmış musiqilər də səsləndirildi. Tədbirin sonunda məktəbin direktoru belə yubileylərin keçirilməsinin şagirdlərin vətənpərvərlik ruhunda tərbiyə edilməsində vacib rol oynadığını qeyd etdi. O, şagirdlərə boş vaxtlarında Azərbaycanın qəhrəmanlarına, tarixi şəxsiyyətlərinə həsr olunmuş bədii və sənədli əsərləri oxumağı tövsiyə etdi.
