Vətən Müharibəsi Qəhrəmanına həsr olunan musiqi layihəsinin təqdimatı keçirilib
Məktəbin akt zalında Vətən Müharibəsi Qəhrəmanı şəhid polkovnik-leytenant Anar Əliyevin xatirəsinə həsr olunmuş musiqi layihəsinin təqdimat mərasimi keçirilib. Tədbirdə məktəbin rəhbərliyi, müəllim-şagird kollektivi ilə yanaşı şəhidin ailə üzvləri, Nizami Rayon İcra Hakimiyyətinin, YAP Nizami Rayon Təşkilatının nümayəndələri, Azərbaycan Respublikasının Milli Qəhrəmanları Tanıtma İctimai Birliyinin İdarə heyəti, 2016-cı il Aprel döyüşlərinin və 2020-ci il Vətən Müharibəsi iştirakçısı Ədhəm Məmmədov, Vətən Müharibəsi veteranı Azərbaycan Respublikası Müdafiə Nazirliyinin Şəhid Ailələri Qadınlar va Hərbi Qulluqçuların Ailələri ilə İş üzrə şöbə müdiri Səmədova Zümrüd və qəhrəmanın döyüş yoldaşları - 20 il Anar Əliyevin komandiri olmuş ehtiyatda olan polkovnik Etibar Məhərrəmov, ehtiyatda olan polkovnik-leytenant Elsevər Hacıyev, ehtiyatda olan polkovnik-leytenant Mürsəl Ağayev və hazırda xidmətdə olan polkovnik-leytenant Fuad Mirzəyev iştirak ediblər. Tədbir şəhidimizin adını daşıyan məktəbin 6A sinfinin sinif rəhbəri Sevda Seyidova tərəfindən təşkil olunub. Dövlət himnimiz səsləndikdən sonra Vətən Müharibəsi Qəhrəmanı Anar Əliyevin və bütün Şəhidlərimizin ruhları sükutla yad edilib. Ardınca tədbirdə iştirak edən qonaqları salamlayaraq mərasimi açıq elan edən Sevda Seyidova Anar Əliyev haqqında və ona həsr olunmuş musiqi layihəsi barədə zalda toplaşanlara geniş məlumat verib. Sonra qəhrəmanımızla bağlı videoçarx nümayiş etdirilib. Daha sonra 6A sinfinin şagirdləri müxtəlif şeirlər, mahnılar səsləndiriblər. Eləcə də, Anar Əliyevin döyüşlər zamanı misilsiz qəhrəmanlığı, şücaəti səhnələşdirilib. Səhnəcikdə Anar Əliyevi onun bizlərə yadigarı, oğlu məktəbin 6A sinif şagirdi Əli canlandırıb. Tədbirdə çıxış edən məktəbin direktoru Kamran İsalı tədbirə görə Sevda müəllimə və şagirdlərinə təşəkkür edib, Anar Əliyev kimi qəhrəmanlarımızla xalqımızın fəxr etdiyini və onların daim yad edilməsinin vacibliyini vurğulayıb. Daha sonra çıxış edən şəhidimizin döyüş yoldaşları dəvətə görə minnətdarlıq edərək Anar Əliyevlə bağlı xatirələrini bölüşüblər. Yekunda çıxış edən Vətən Müharibəsi Qəhrəmanı şəhid polkovnik-leytenant Anar Əliyevin həyat yoldaşı Vüsalə Əliyeva göstərilən diqqət və qayğıya görə öz təşəkkürünü bildirib.
