"Kitablar başqa dünyalara açılan qapılardır" adlı tədbir təşkil olunub
6 Aprel 2023-cü il tarixində məktəbin konfrans zalında ibtidai sinif müəllimi Ulduz Əliyevanın təşkilatçılığı ilə rəhbəri olduğu 2B sinif şagirdlərinin hazırladığı "Kitablar başqa dünyalara açılan qapılardır" adlı maarifləndirici və eyni zamanda əyləncəli tədbir keçirilib. Tədbirdə məktəbin direktoru Kamran İsalı, direktor müavinləri Şəfiqə Əlizadə, Anar Miriyev, Uşaq Birliyi Rəhbəri Ətlas Rəhimova, psixoloqlar Çinarə Həsənova, Nigar Babayeva, müəllimlər və valideynlər iştirak ediblər. Tədbiri giriş sözü ilə açan sinif rəhbəri qonaqları salamlayıb və tədbirin mahiyyəti haqqında məlumatlar təqdim edib. Tədbirin məqsədinin şagirdlərdə mütaliə vərdişlərinin formalaşdırılması olduğunu qeyd edən Ulduz müəllimə daha sonra sözü şagirdlərə verib. Şagirdlər müxtəlif tanınmış əsərlərdən parçaları səhnələşdirib, həmçinin kitabların təqdimatlarını nümayiş etdiriblər. Eləcə də, bir sıra mahnı və rəqslər ifa ediblər. Tədbirin yekununda çıxış edən direktor Kamran müəllim tədbirin keçirilməsinə görə sinif rəhbəri, şagirdlər və valideynlərə təşəkkür edib, bu qəbildən olan tədbirlərin şagirdlərin dünyagörüşündə önəmli yer tutduğunu vurğulayıb.
