Dövlət Bayrağı Günü qeyd olunub
9 noyabr - Azərbaycan Respublikasının Dövlət Bayrağı Günü münasibəti ilə məktəbin musiqi müəllimi Könül Zeynalovanın rəhbəri olduğu 6A sinfi ilə təşkil etdiyi tədir keçirilib.
Əllərində Dövlət Bayrağı olan şagirdlər musiqi sədaları altında meydana daxil olublar. Daha sonra Azərbaycan Respublikasının Dövlət Himni səsləndirilib, Vətən uğrunda canlarından keçən şəhidlərin xatirəsi bir dəqiqəlik sükutla yad edilib.
Tədbirdə Azərbaycan Bayrağının keçdiyi şanlı tarixi yoldan danışılılıb. Məlumat verilib ki, Şərqdə ilk demokratik dövlət olan Azərbaycan Xalq Cümhuriyyətinin bayrağı üç dəfə, Azərbaycan Sovet Respublikasının bayrağı isə 9 dəfə müxtəlif şəkillərdə tərtib edilib. Nəhayət, 1991-ci il fevralın 5-də müstəqil Azərbaycan Respublikasının Dövlət Bayrağı kimi Azərbaycan Demokratik Respublikası dövründə qəbul edilmiş üçrəngli bayraq qəbul edilib.
Tədbirdə o da vurğulanıb ki, Prezident İlham Əliyev 2007-ci il noyabrın 17-də Bakıda Dövlət Bayrağı Meydanının yaradılması barədə, 2009-cu ilin noyabrında isə Dövlət Bayrağı gününün təsis edilməsi haqqında Sərəncam imzalamışdır. Sərəncama əsasən hər il noyabrın 9-u Respublikamızda Dövlət Bayrağı Günü kimi qeyd olunur.
Tədbir şagirdlərin hazırladığı konsert proqramı ilə davam edib. Məktəblilər bayrağımıza həsr olunan şeir və mahnılar səsləndirib, milli rəqslərimizi nümayiş etdiriblər.
