Heydər Əliyevə həsr olunan “Həyatdan hekayə” adlı sərgi təşkil olunub
May ayının 10-da Azərbaycan xalqının Ümummilli lideri, dünya səviyyəli siyasi xadim Heydər Əliyevin anadan olmasının 99-cu ildönümü tamam olur. Heydər Əliyev çoxəsrlik dövlətçilik tariximizdə yeni parlaq səhifə açan nadir, bənzərsiz şəxsiyyətdir. Tarixin yaddaşında əbədi iz qoymaq hər insana nəsib olmayan böyük xoşbəxtlikdir. Bütün həyatını xalqının xoşbəxt gələcəyinə, qüdrətli Azərbaycan dövlətinin yaradılmasına və inkişafına həsr etmiş bu dahi şəxsiyyətin Vətən və xalq qarşısındakı xidmətləri misilsizdir. Azərbaycanda müstəqil dövlət təsisatlarının qurulması, beynəlxalq normalara söykənən demokratik, hüquqi dövlətin yaranması, milli, mənəvi və əxlaqi dəyərlərimizin qorunub saxlanması, bu dəyərlərin ümumbəşəri ideyalarla daha da zənginləşdirilməsi, ilk Milli Konstitusiyamızın qəbul edilməsi, vətəndaş cəmiyyətinin formalaşdırılması və yeni iqtisadi kursun müəyyənləşdirilməsi prosesinin müvəffəqiyyətli həlli məhz Ümummilli liderimiz Heydər Əliyevin xidmətləridir.
Doğum günü ərəfəsində məktəbin foyesində 6 may 2022-ci il tarixində böyük şəxsiyyətə həsr olunmuş sərgi təşkil olunub. Məktəbin istedadlı şagirdlərinin hazırladığı divar qəzeti və rəsm əsərlərinin olduğu sərgidə Heydər Əliyevin həyat və fəaliyyətinin müxtəlif dövrlərini əks etdirən məlumatlar, Ulu Öndər haqqında görkəmli şəxslərin fikirləri, fotolar, Heydər Əliyev irsi, onun Azərbaycan tarixində, mədəniyyətində, elmin inkişafında rolu haqqında məqalələr nümayiş olunub.
