“Dünyanın ən böyük azərbaycanlısı” adlı tədbir keçirilib
Məktəbin konfrans zalında 06.05.2022-ci il tarixində direktor müavini Anar Miriyev və tarix fənn müəllimi Şövqiyyə Əliyevanın təşkilatçılığı ilə hazırlanmış Ulu Öndər Heydər Əliyevin anadan olmasının 99-cu ildönümü münasibətilə “Dünyanın ən böyük azərbaycanlısı” adlı tədbir keçirilib. Tədbirdə direktor müavini Anar Miriyev, Nizami Rayon Ağsaqqallar Şurasının sədri Mayıl Əliyev, YAP Nizami rayon təşkilatının məsləhətçisi Selcan Novruzzadə, məktəbin müəllimləri və şagirdləri iştirak ediblər. Tədbirdə Ulu Öndər Heydər Əliyevin xatirəsinə həsr olunmuş videoçarx nümayiş etdirilib, şagirdlər Ümummilli liderə həsr olunan şeirlər səsləndiriblər. Daha sonra çıxış edənlər bildiriblər ki, Azərbaycanın müstəqil, suveren dövlət kimi bərqərar olub inkişaf etməsində, tərəqqisində və bu gün dünya birliyində layiqli yer tutmasında Heydər Əliyev ideyalarının, onun siyasətinin əvəzsiz rolu var.
Vurğulanıb ki, bu gün də həmin siyasət uğurla davam edir və Prezident İlham Əliyev Heydər Əliyev siyasətinin layiqli davamçısı olaraq ölkəmizi daha uca, yeni zirvələrə yüksəldib. Ən əsası, Ulu Öndərin ən böyük arzusu olan Qarabağın işğaldan azad olunması missiyasını Prezident İlham Əliyev yerinə yetirib. Bu səbəbdən də bu gün Azərbaycan xalqı Ulu Öndərimizi qalib əhval-ruhiyyəsində, ərazi bütövlüyünü təmin edən ölkənin vətəndaşları kimi xatırlayır, xatirəsini ehtiramla yad edir.
Çıxışlardan sonra YAP-a yeni üzv olmuş şəxslərə vəsiqələr təqdim edilib, 20 ildən artıq partiya üzvü olan məktəb kollektivinin nümayəndələri təltif olunublar.
