Şagirdimiz rəsm müsabiqəsində fərqlənib
Nizami Rayon İcra Hakimiyyətinin və Azərbaycan Rəssamlar İttifaqının birgə təşkilatçılığı ilə Ulu Öndər Heydər Əliyevin anadan olmasının 99-cu ildönümünə həsr olunmuş “Varlığımsan, Azərbaycan” adlı rayon məktəblilərinin rəsm müsabiqəsi keçirilib.
Tədbirdə qonaqlar, rayon ictimaiyyətinin nümayəndələri, təhsil müəssisələrinin kollektivləri, məktəblilər iştirak edib. Məktəbin direktoru Rahim Novruzov da qonaqlar arasında olub.
Tədbir iştirakçıları əvvəlcə Ulu Öndər Heydər Əliyevin portretlərindən ibarət rəsm sərgisi ilə tanış olublar.
Tədbiri Rayon İcra Hakimiyyətinin başçısı Coşqun Cəbrayılov açaraq qeyd edib ki, Ulu Öndərimiz Heydər Əliyevin anadan olduğu 10 may təqvimimizə əbədi həkk olunmuş tarixi bir gündür. Əlavə edib ki, Heydər Əliyev Azərbaycanın ən yeni tarixini yazan və yaradan dahi şəxsiyyət, müdrik rəhbər və görkəmli dövlət xadimidir.
Müsabiqənin şərtləri barədə ümumi məlumat verildikdən sonra müsabiqəyə start verilib.
Tədbirdə 11-17 yaş kateqoriyaları üzrə 32 nəfər məktəbli iştirak edib. İştirakçılar arasında məktəbin 9 "A" sinif şagirdi Sərkər Təhminənin çəkdiyi rəsm fərqlənənlər arasında olub və şagirdimiz təltif edilib.
