“ADPU – 100” mövzusunda “dəyirmi masa” təşkil olundu
Oktyabr ayının 8-də məktəbdə Azərbaycan Dövlət Pedaqoji Universitetinin (ADPU) 100 illik yubileyinə həsr edilmiş dəyirmi masa keçirilib. Pandemik şəraitlə bağlı sanitar-gigienik tələblərə uyğun məhdud sayda iştirakçı ilə keçirilən tədbirdə məktəbin rəhbər heyəti və müəllimlər iştirak edib.Dəyirmi masanı giriş sözü ilə açan məktəbin direktoru Rahim Novruzov ADPU-nun qurucularının xatirələrini yad edərək universitetin ölkəmizin milli pedaqoji təhsil sferasında hər zaman xüsusilə fərqləndiyini qeyd edib.Ulu öndər Heydər Əliyevin daim ADPU-ya diqqətindən danışan direktor həmçinin, bu yaxınlarda ölkə prezidenti İlham Əliyevin imzaladığı Pedaqoji Universitetin 100 illik yubileyinin keçirilməsi haqqında sərəncamda universitetin fəaliyyətinə olduqca yüksək qiymət verildiyini vurğulayıb.Natiq çıxışının sonunda qeyd edib ki, Pedaqoji Universitetin 100 illiyi təkcə ADPU-nun yox, bütün Azərbaycan xalqının bayramıdır və məktəbimiz ADPU-nun yubileyi ilə bağlı silsilə tədbirlər keçirməkdədir.Daha sonra çıxış edənlər ADPU-nun çətin və şərəfli inkişaf yolundakı maraqlı məqamlara nəzər salıblar.
