"Şaxta babadan 12 istəyim" adlı bayram tədbiri keçirildi
29 dekabr 2019 - cu il tarixdə məktəbin Akt zalında tərbiyə işləri üzrə direktor müavini Anar Miriyevin rəhbərliyi ilə "Şaxta babadan 12 istəyim" adlı bayram tədbiri keçirildi. Bayram tədbirində məktəbin direktoru Rahim Novruzov, təlim - tərbiyə işləri üzrə direktor müavinləri Natəvan Mustafayeva və Şəfiqə Əlizadə, tərbiyə işləri üzrə direktor müavini Anar Miriyev, uşaq birliyi rəhbəri Ətlas Rəhimova, müəllimlər, şagirlər və valideynlər iştirak etdilər.
Bayram tədbiri şagirdlərin ifasında Azərbaycan Respublikasının Dövlət Himninin səsləndirilməsi ilə başladı. Ardınca aparıcılar tədbiri izləyən hər kəsi salamladı və Dünya Azərbaycanlılarının Həmrəylik Günündən bəhs edən video çarx nümayiş etdirildi. Dünya Azərbaycanlılarının Həmrəylik Günü və Yeni il bayramı münasibəti ilə təşkil olunmuş tədbir şagirdlərin ifasında bir - birindən gözəl şeir, rəqs və musiqi nömrələrinin ifa edilməsi ilə davam etdi. Məktəbin istedadlı şagirdlərinin musiqi alətlərində ifa etdikləri musiqi nömrələri tədbiri daha da canlandırdı. Tədbirin davamında şagirdlər musiqi sədaları altında Şaxta babanı səhnəyə dəvət etdilər. Şaxta babanın şənliyə gəlməsi uşaqlara böyük sevinc bəxş etdi. Tədbirin sonunda məktəbin direktoru tədbirin hazırlanmasında əziyəti keçən hamıya öz təşəkkürünü bildirdi və müəllimlər başda olmaqla, bütün şagird kollektini və onların valideynlərini Dünya Azərbaycanlılarının Həmrəylik Günü və Yeni il bayramı münasibəti ilə təbrik etdi.
