“Şahin” hərbi-idman oyunu
08 aprel 2017-ci il tarixdə Heydər Əliyev Adına Azərbaycan Ali Hərbi Məktəbdə yeniyetmə və gənclərin vətənpərvərlik və vətəndaşlıq tərbiyəsi işinin gücləndirilməsi, məktəblilərin hərbi xidmətə hazırlıq səviyyəsinin yüksəldilməsi məqsədilə Azərbaycan Respublikası Gənclər və İdman, Müdafiə, Təhsil, Fövqəladə Hallar, Mədəniyyət və Turizm nazirliyi, Səfərbərlik və Hərbi Xidmətə Çağırış üzrə Dövlət Xidməti, və Respublika Veteranlar Təşkilatının birgə qərarı ilə təsdiq edilmiş Əsasnaməyə uyğun olaraq Xətai rayon orta ümumtəhsil məktəblərinin şagirdlərinin iştirakı ilə “Şahin” hərbi-idman oyununun rayon mərhələsi keçirilmişdir. Tədbirdə Xətai Rayon İcra Hakimiyyəti başçısının müavini Jalə Abdıyeva, Bakı şəhər Gənclər və İdman Baş İdarəsinin rəisi Raqif Abbasov, Heydər Əliyev Adına Azərbaycan Ali Hərbi Məktəbin rəisi polkovnik Fizuli Salahov, Xətai Rayon İcra Hakimiyyəti İctimai-siyasi və humanitar məsələlər şöbəsinin müdiri Pənah İmanov, Xətai rayon Gənclər və İdman İdarəsinin rəisi Əfqan Rzayev, Bakı Şəhəri üzrə Təhsil İdarəsinin Təlimə Dəstək Mərkəzinin bölmə müdiri Mürsəl Qurbanov, məktəb direktorları, hərbi hazırlıq və fiziki tərbiyə müəllimləri iştirak etmişdir. Tədbir iştirakçıları ilk öncə Ulu Öndər Heydər Əliyevin xatirəsinə ucaldılan abidənin önünə gül dəstələri düzmüşlər. Sonra Ulu Öndər Heydər Əliyevin və Azərbaycanın ərazi bütövlüyü uğrunda şəhid olanların xatirəsi bir dəqiqəlik sükutla yad edilmiş, Azərbaycan Respublikasının dövlət himni səsləndirilmişdir. Tədbirdə çıxış edən Bakı şəhər Gənclər və İdman Baş İdarəsinin rəisi Raqif Abbasov, rayon İcra Hakimiyyəti başçısının müavini Jalə Abdıyeva bildirmişlər ki, Azərbaycan Respublikasının Prezidenti, Ali Baş Komandan cənab İlham Əliyevin qətiyyəti sayəsində işğal altındakı torpaqlarımız düşmən işğalından tezliklə azad olunacaq. Bu gün bütün sahələrdə olduğu kimi ordu quruculuğu, hərbçilərin və onların ailələrinin sosial rifahının yaxşılaşdırılması, şəhid ailələri və qarabağ müharibəsi əlillərinə diqqət artmaqdadır. Bu dövlət siyasətinin mühüm prioritetlərindən biridir. Cənab Prezident tərəfindən imzalanan müvafiq fərman və sərəncamlar bizi bir daha əmin edir ki, ölkə başçısı xalqımız ilə birlikdə tezliklə işğalda olan torpaqlarımızın azad olunmasına nail olacaqdır. Çıxışlardan sonra yarışa start verilmişdir. Qeyd edək ki, yarışda 37 orta ümumtəhsil məktəbindən hər bir komandanın tərkibi 14 nəfər (10 oğlan, 4 qız) olmaqla 8 və 10-cu sinif şagirdləri (5 oğlan və 2 qız 8-ci sinif; 5 oğlan və 2 qız 10-cu sinif) ümumilikdə 518 nəfər şagird iştirak etmişdir. Komandalar yarışın 8 mərhələsi üzrə öz qüvvələrini sınayırlar. Hər bir komandanın xalı münsiflər heyəti tərəfindən 5 (beş) ballıq sistem üzrə qiymətləndirilir.Yekunda hər bir komandanın ayrı-ayrı mərhələlər üzrə əldə etdiyi orta balların cəmi məlum olduqdan sonra, yarışın gedişində itirilmiş və qazanılmış balları nəzərə almaqla əldə olunan nəticə 8-ə (mərhələlərin sayına) bölünür və həmin nəticə onluq dəqiqliyi ilə hesablanaraq komandaların əldə etdiyi yekun nəticə qiymətləndirilir və yerlər müəyyənləşdirilir.
