27 sentyabr - "Anım Günü"
27 sentyabr - İkinci Qarabağ müharibəsində həyatını itirən şəhidlərin xatirəsinin "Anım Günü"dür. Məktəbin 4 “A” sinif müəllimi Kifayət Axundova ilk dərsi “Anım Günü”nə həsr edərək bu gün haqqında şagirdlərə məlumat verdi. O bildirdi ki, 27 sentyabr təkcə “Anım Günü” deyil, həmçinin Qarabağın 30 illik işğaldan azad olunması uğrunda gedən mübarizənin başlandığı gündür. Ermənistanın Respublikasının ölkəmizə qarşı 2020-ci il sentyabrın 27-dən başlayan növbəti hərbi təcavüzünə cavab olaraq, Azərbaycan Respublikası Silahlı Qüvvələri Ali Baş Komandanın rəhbərliyi altında işğal altındakı torpaqlarımızın azad edilməsi məqsədilə Vətən müharibəsinə başlamışdır. Azərbaycan Respublikasının suverenliyi və ərazi bütövlüyü uğrunda gedən mübarizədə rəşadət göstərən əsgər və zabitlərimizin əzm və iradəsidir ki, bu gün Qarabağ işğaldan azad olunub.
Azərbaycan hər zaman mübariz oğul və qızlarının şücaətini yüksək qiymətləndirir, bütün şəhidlərimizin ruhuna ehtiram göstərir, xatirəsini uca tutur. Bu səbəbdən Vətən müharibəsində qəhrəmancasına döyüşmüş, Azərbaycan Bayrağını işğaldan azad edilən torpaqlarımızda dalğalandırmış, ölkəmizin ərazi bütövlüyü yolunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq, Azərbaycan Respublikasının Prezidenti İlham Əliyevin2020-ci il 2 dekabr tarixli Sərancamı ilə hər il sentyabrın 27-si Azərbaycan Respublikasında Anım Günü kimi qeyd edilir.
Allah bütün şəhidlərimizə rəhmət eləsin!
