"Ana dilim" mövzusunda təqdimat
12 yanvar tarixində məktəbimizin Azərbaycan dili müəllimi Muradova Günel və 1 R sinif şagirdlərinin iştirakı ilə “Ana dilim “ mövzusunda təqdimat keçirildi.
Əvvəlcə müəllim ana dilimizin tarixi haqqında şagirdlərə qısa məlumat verdi. Daha sonra ümummilli lider Heydər Əliyevin dilimizə göstərdiyi diqqət və qayğını, onun dil haqqında dedikləri fikirləri, 2001-ci il avqustun 9-da imzaladığı “Azərbaycan əlifbası və Azərbaycan dili gününün təsis edilməsi haqqında” Fərmana əsasən, hər il 1 avqust ölkəmizdə Azərbaycan əlifbası və Azərbaycan dili günü kimi qeyd olunması vurğulandı.
H.Əliyev dil haqqında demişdir : ”Biz türk mənşəli xalqıq. Azərbaycan dili də türk xalqları dillərinə mənsubdur, lakin biz öz dilimizi heç bir dilə qarışdırmamalıyıq. Bizim öz dilimiz var. Hər bir dilə hörmət edirəm, ancaq hesab edirəm ki, hər bir azərbaycanlı öz dili ilə fəxr etməlidir ! ”
Şagirdlər B.Vahabzadə, X.R.Ulutürk, S.Vurğunun ana dilinə həsr etdikləri şeirləri və tanınmış şəxsiyyətlərin bu barədə dedikləri fikirləri səsləndirdilər. Sonda bəstəkar Emin Sabitoğlunun bəstələdiyi “ Şirin dil “ mahnısını ifa etdilər.