Aşıq Ələsgərin həyat və yaradıcılığına həsr olunmuş "Dəyirmi masa" keçirilib
2021-ci ildə Azərbaycan aşıq sənətinin görkəmli nümayəndəsi, qüdrətli söz ustadı Aşıq Ələsgərin anadan olmasının 200 illiyi tamam olur.
90 nömrəli tam orta məktəb kitabxanasında ustad sənətkar Aşıq Ələsgərin 200 illik yubileyinə həsr olunmuş "Dəyirmi masa" keçirilib.
"Dəyirmi masa"da qeyd edilib ki,Aşıq Ələsgər çoxəsrlik keçmişə malik aşıq sənəti ənənələrinə ən yüksək bədii-estetik meyarlarla yeni məzmun qazandırmış, xalq ruhuyla həmahəng əsərləri ilə Azərbaycanın mədəni sərvətlər xəzinəsinə misilsiz töhfələr bəxş etmişdir. Sənətkarın doğma təbiətə məhəbbət və vətənpərvərlik hisslərini vəhdətdə aşılayan, ana dilimizin saflığını, məna potensialını və hüdudsuz ifadə imkanlarını özündə cəmləşdirən dərin koloritli yaradıcılığı Azərbaycan ədəbiyyatının parlaq səhifələrindəndir. Aşıq Ələsgər çox sayda yetirmələrindən ibarət bir məktəb formalaşdırmış və gələcəyin məşhur el şairlərinə qüvvətli təsir göstərmişdir. Azərbaycan aşıq sənətinin ümumbəşəri dəyərlər sırasında qorunan dünya qeyri-maddi mədəni irs nümunələri siyahısına salınması həm də Aşıq Ələsgər sənətinə ehtiramın təzahürüdür.
Ustad sənətkar Aşıq Ələsgərin həyat və yaradıcılığına həsr olunmuş "Dəyirmi masa"da şagirdlər Aşıq Ələsgər irsinin təbliği və əsərlərinin müzakirəsi istiqamətində geniş söhbətlər aparıb ,şeirlər səsləndiriblər.
