Beynəlxalq Ana Dili Günü
21 Fevral bütün dünyada Beynəlxalq Ana Dili Günü qeyd olunur. Dünyada məhv olmaq təhlükəsi ilə üzləşən dillərin qorunması məqsədilə hər il keçirilən Beynəlxalq Ana Dili Günü hər kəsə öz doğma dilinin varlığını hiss etmək, onunla qürur duymaq, onu qorumaq, inkişaf etdirmək hüququ olduğunu bir daha xatırladır. Ən sadə şəkildə desək, dil ünsiyyət vasitəsidir, dil millətin simasını səciyyələndirən amillərdən biri, bəlkə də, birincisidir. O, hər hansı bir xalqın varlığının təzahürü, onun milli sərvəti, qan yaddaşıdır.
Bu gün 21 fevral Beynəlxalq Ana Dili Gününü 74 nömrəli məktəbin müəllim kollektivi də "dəyirmi masa" ətrafında qeyd etdi. Məktəbin direktoru Əfqan Həsənov öz cıxışında bildirdi ki, xalqın taleyi, onun mənliyi, mənəviyyatı və mədəniyyəti olan dil cəmiyyətin təşəkkülü və inkişafı ilə birgə yaranır, tərəqqi edir. İnsanın təkamülündə ana dilinin rolu böyükdür. O qeyd etdi ki, insanın doğumu ilə bərabər bəxş olunmuş bu nemətin hər hansı bəhanə ilə qadağan olunması isə cinayətdir. Beynəlxalq Ana Dili Günü hamını bu cinayətə qarşı birləşməyə səsləyir. Ana dilimizi qorumaq, inkişaf etdirmək bizim də borcumuzdur.
