Heydər Əliyevin Anım Gününə Həsr Olunmuş Şahmat Yarışı
Heydər Əliyevin Anım Gününə Həsr Olunmuş Şahmat Yarışı
Ümummilli Lider Heydər Əliyevin əziz xatirəsinə həsr olunmuş tədbirlər çərçivəsində 12 dekabr 2024-cü il tarixində məktəbimizdə 9-12 yaşlı şagirdlər arasında şahmat yarışı təşkil edildi. Tədbir Azərbaycanın Dövlət Himninin səsləndirilməsi və ulu öndərin əziz xatirəsinin bir dəqiqəlik sükutla yad edilməsi ilə başladı.
Açılış mərasimində məktəbimizin direktoru Yasəmən Əliyeva çıxış edərək, Heydər Əliyevin gənc nəslin təhsili və intellektual inkişafına verdiyi böyük önəmi vurğuladı. Direktor bildirdi ki, şahmat yalnız bir idman növü deyil, həm də strateji düşüncənin, məntiqi təfəkkürün inkişafına təsir edən mühüm vasitədir. Yasəmən Əliyeva bu cür tədbirlərin Heydər Əliyevin ideyalarının gələcək nəsillərə çatdırılması baxımından əhəmiyyətini xüsusi qeyd etdi.
Daha sonra şahmat turnirinə start verildi. Yarışda müxtəlif siniflərdən olan 20-yə yaxın şagird iştirak etdi. Şagirdlər öz məntiqi düşüncə və strategiya qurma bacarıqlarını nümayiş etdirərək qalib olmaq üçün əzmkarlıqla mübarizə apardılar.
Heydər Əliyevin zəngin irsini yaşatmaq məqsədilə təşkil olunan bu tədbir, həm şagirdlərin intellektual inkişafına, həm də onların milli ruhda tərbiyəsinə töhfə verdi.
