“Sən hədəf deyilsən!” adlı ədəbi-bədii kompozisiya
Müasir dünyada cəmiyyəti narahat edən problemlər içərisində ən mürəkkəbi, faciəvi nəticələrə gətirib çıxaranı narkomaniya və zərərli vərdişlərdir. Ən acınacaqlısı da budur ki, gənclər və yeniyetmələr arasında bu cür hallar artmağa doğru gedir. Belə ciddi məsələni gündəmə gətirmək məqsədilə 12 fevral tarixində məktəbdə psixoloq Nəsibova Vüsalənin təşkilatçılığı və yuxarı sinif şagirdlərinin iştirakı ilə “Sən hədəf deyilsən!” adlı ədəbi-bədii kompozisiya keçirildi. Tədbiri giriş sözü ilə məktəbin direktoru Tahirə Şükürova açaraq gələn qonaqları salamladı. Sonra çıxış edərək bu bəlanın insanların həm sağlamlığına, həm də mənəviyyatına ciddi zərbə vurduğunu dedi. O, qeyd etdi ki, bir məktəb olaraq bu cür zərərli vərdişlərdən uzaq olmağı böyüməkdə olan gənc nəslə aşılamaq bizim üzərimizə düşür. Ona görə də bu məqsədlə məktəbimizdə mütəmadi olaraq maarifləndirmə işləri aparılır. Sonra məktəbin direktoru sözü şagirdlərə verdi. Onlar hazırladıqları kompozisiyada valideynın sözündən kənara çıxaraq zərərli vərdişlərin aludəçisi olan gənclərin acı taleyini, acınacaqlı sonluğunu nümayiş etdirdilər. Kompozisiya şagirdlər tərəfindən alqışlarla qarşılandı. Tədbirdə BŞTİ-nin inkişaf layihələri sektorunun aparıcı mütəxəsisi Xəyalə Rüstəmova, Təlimə Dəstək Mərkəzinin psixoloji xidmət üzrə metodisti Səidə Əhmədova, Nərimanov rayon İcra Hakimiyyətinin ictimai-siyasi əlaqələr şöbəsinin baş məsləhətçisi Nicat Məmmədov və Nərimanov rayon məktəblərinin psixoloq və şagirdləri iştirak edirdi.