31 Mart - Azərbaycanlıların Soyqrımı Gününə həsr olunmuş tədbirlər keçirilib.
Əsrlər boyu Azərbaycan tarixinə şanlı səhifələrlə yanaşı, mənfur qonşularımız üzündən faciələr və soyqırımları, müsibətlərlə dolu səhifələr yazılıb. 1918-ci ilin mart soyqırımları öz amansızlığına və miqyasına görə təkcə Azərbaycan tarixində deyil, bəşər tarixində də ən qanlı faciələrdən biridir. Əllərinə düşən fürsətdən istifadə edən ermənilər uşaq, qoca, qadın demədən minlərlə insanı qılıncdan, süngüdən keçirdilər, diri-diri yandırdılar. Milli memarlıq incilərini, məktəbləri, xəstəxanaları, məscid və digər abidələri dağıtdılar. Bakının böyük bir hissəsini xarabalığa çevirdilər. Azərbaycanlıların soyqırımı təkcə Bakıda deyil, Şamaxı, Quba qəzalarında, Qarabağda, Zəngəzurda, Naxçıvanda, Lənkəranda, Gəncədə və digər bölgələrdə xüsusi qəddarlıqla həyata keçirildi. Bu ərazilərdə dinc əhali kütləvi surətdə qətlə yetirildi, şəhər və kəndlər yandırıldı, milli mədəniyyət abidələri dağıdılıb məhv edildi.
Azərbaycan dövlət müstəqilliyini bərpa etdikdən sonra xalqımızın tarixi keçmişinin obyektiv mənzərəsini ortaya qoymaq imkanı yarandı. Ulu öndər Heydər Əliyevin “Azərbaycanlıların soyqırımı haqqında” 1998-ci il 26 mart tarixli Fərmanı ilə soyqırımı aktlarına siyasi-hüquqi qiymət verilməsi bu sahədə aparılan tədqiqatlara, həqiqətin üzə çıxarılması istiqamətində səylərin artırılmasına təkan verdi. Azərbaycan xalqına qarşı törədilmiş bütün soyqırımı faciələrini qeyd etmək məqsədilə 31 mart Azərbaycanlıların Soyqırımı Günü elan edildi. Bu gün hər yerdə olduğu kimi məktəbimizdə də həm distant həm də əyani dərslərdə faciə qurbanlarının xatirəsi anıldı. Tarix müəllimləri Abdullayeva Lalə, Gülnarə Tanqrıverdiyeva, Zəhra Babayeva mövzuya həsr olunmuş seminar təşkil etdilər. Seminarda bu hadisələrin mahiyyəti haqda ətraflı məlumat verildi, əsrlər boyu xalqımıza qarşı törədilən vəhşiliklərdən, soyqırımlarından söhbət açıldı, videoçarxlar nümayiş etdirildi.
