34 №-li tam orta məktəb

   17 aprel 2019-cu il tarixdə Daxili İşlər Nazirliyinin Daxili Qoşunların “N” saylı hərbi hissəsində Nərimanov Rayon İcra Hakimiyyətinin, Azərbaycan Respublikasının Səfərbərlik və Hərbi Xidmətə Çağırış üzrə Dövlət Xidmətinin Nərimanov Rayon İdarəsinin və Rayon Gənclər və İdman İdarəsinin birgə təşkilatçılığı ilə “Şahin” hərbi-idman oyununun rayon birinciliyi keçirilib.
        “Şahin” hərbi-idman oyununun keçirilməsində məqsəd böyüməkdə olan nəslin hərbi vətənpərvərlik tərbiyəsinə diqqət və qayğını daha da artırmaq, məktəb şagirdlərini hərbi-idman oyunlarına geniş cəlb etməklə onların ordu sıralarında xidmətə hazırlanmasına kömək göstərilməsindən ibarətdir. 
     Yarışda komandanı yüksək səviyyədə hazırladığına görə hərbi hazırlıq müəllimi Fədai Azadəliyev və fərqləndiyinə görə məktəb şagirdləri Fəxri Fərmanla təltif olunmuşlar.

          12 aprel tarixində 34 nömrəli tam orta məktəbdə təşkil olunan təlimdə məktəbin pedaqoji kollektivi və valideynlər iştirak ediblər.

        Təlimin əsas məqsədi məktəblilərin müxtəlif peşələrə olan meyil və maraqlarının müəyyənləşdirilməsi, gələcəkdə peşə və ixtisas seçimində onlara köməklik göstərilməsi, övladlarını yaradıcı əməyə hazırlamaq və düzgün ixtisas seçiminə yönəltmək barədə valideynlərin məlumatlandırılmasından ibarətdir. Təlimdə şagirdlərə iş və karyera arasındakı fərq, şəxsi maraq və dəyərlərə uyğun karyera seçimi məsələlərinə aydınlıq gətirilib. Eyni zamanda, iş, karyera anlayışları və düzgün peşə seçimi prosesinin mərhələləri də müxtəlif nümunələr əsasında müzakirə olunub.

        Sonda isə məktəbin direktoru tarix üzrə fəlsəfə doktoru Rəhman Hacıyev çıxış edərək valideynlərə övladlarının peşə seçimində tövsiyələr verdi və bu seçimdə onlara uğurlar arzu etdi.

8 aprel 2019-cu il tarixində Nərimanov Rayon Gənclər və İdman idarəsinin təşkilatçılığı ilə Odlar Yurdu Universitetində Aprel döyüşlərinin üçüncü ildönümünə həsr olunan tədbir keçirilib.

Məktəbin şagirdləri içərisindən 2016-cı ilin döyüşlərinə həsr edilmiş "Aprel döyüşləri bizim şanlı tariximizdir" mövzusunda keçirilmiş inşa-yazı və rəsm müsabiqəsində Zeynəb Muxtarova I yeri tutaraq diplom və medal, fərqlənənlər isə fəxri fərmanlar və sertifikatla təltif olunmuşlar.

           Məktəbin direktoru tarix üzrə fəlsəfə doktoru Rəhman Hacıyev fərqlənən şagirdləri təbrik etmiş, onlara gələcək müsabiqələrdə uğurlar arzulamışdır.

Ümumi təhsil müəssisələrində Novruz bayramı ilə əlaqədar təntənəli mərasimlər keçirilib.

Belə ki, paytaxt məktəblərində "Gəl, Novruzum", “Novruz töhfələri”, “Novruz gəlir, yaz gəlir”, "Novruz adətlərimiz", “Yurdumuza yaz gəlir”, “Səməni saxla məni”, “Novruz xalq bayramıdır” və digər müvafiq mövzularda tədbirlər, ədəbi-bədii kompozisiyalar, “Dəyirmi masa”lar, şagirdlərin əl işlərindən ibarət sərgilər təşkil edilib. Həmçinin bir sıra məktəblərin pedaqoji kollektiv üzvləri və şagirdləri hərbi hissələrə, uşaq evlərinə səfərlər edib, imkansız ailələrə bayram sovqatı aparıblar.

Bundan əlavə, təhsil müəssisələrində Novruz bayramı münasibətilə divar qəzetləri, stendlər və guşələr, bülletenlər hazırlanıb, müxtəlif nominasiyalar üzrə müsabiqələr təşkil olunub.

Bakı Şəhəri üzrə Təhsil İdarəsi əməkdaşlarının, yerli icra qurumlarının, ziyalıların, şair və yazıçıların, məktəblərin pedaqoji kollektivi, valideyn və şagirdlərin iştirak etiyi tədbirlərdə xalqımızın qədim tarixini əks etdirən, milli adət və ənənələrimizi özündə birləşdirən Novruz bayramının tarixi, su, od, yel və torpaq çərşənbələrinin mahiyyəti, Novruz atributları haqqında şagirdlərə geniş məlumat verilib. Bildirilib ki, bu bayramın qədim adət-ənənələrinin bütün rəngarəngliyi ilə qorunub saxlanılması Azərbaycan xalqının öz tarixi-mədəni keçmişinə yüksək ehtiramını və milli-mənəvi dəyərlərə dərin bağlılığını nümayiş etdirir. Bolluq, xeyirxahlıq, gözəllik və humanist ideyalar bayramı olan Novruzun dünyadakı bütün azərbaycanlılar tərəfindən qeyd edilməsi milli birliyin nişanəsidir.

Tədbirlərdə milli adət-ənənələrin gələcək nəsillərə ötürülməsinin və milli-mənəvi dəyərlərimizin qorunub saxlanılmasının vacibliyi şagirdlərin diqqətinə çatdırılıb.

Bayram şənliklərində şagirdlər baharın təravətli nəfəsini özü ilə gətirən Novruz bayramına aid mahnılar ifa edib, şeirlər səsləndirib, maraqlı səhnəciklər nümayiş etdiriblər. Şagirdlərin ifasında milli rəqslər, xalq oyunları, Keçəl və Kosanın məzəli əhvalatları, Bahar qızının gəlişi tədbirlərə rəngarənglik qatıb.   

Sonda bayram tonqalı qalanıb, məktəblilər tonqal ətrafında yallı gediblər.

15 mart məktəbin 9-cu siniflərində BŞTİ - nin təşəbbüsü ilə buraxılış imtahanlarının ikinci mərhələsində şagirdlərə kömək məqsədi ilə tədris dili, riyaziyyat və ingilis dili olmaqla üç fənn üzrə diaqnostik qiymətləndirmə keçirildi. Şəffaflığın qorunması və şişirdilmiş nəticəyə yol verməmək məqsədi ilə Azərbaycan bölməsi üzrə iki sinifdə təhsil alan şagirdlər bilik səviyyəsinə görə əla, yaxşı, orta, zəif, çox zəif olmaqla 5 qrupa bölünərək, ayrı - ayrı otaqlarda yerləşdirildilər. Şagirdlər 150 dəqiqə ərzində 3 fənn üzrə 90 sualı cavablandırdılar. DQ - dən dərhal sonra nəticələr yoxlanaraq Bakı şəhəri üzrə Təhsil İdarəsinin Keyfiyyətə Nəzarət sektoruna göndərildi.