34 №-li tam orta məktəb

              Sultanov  Bəhruz Yusif oğlu

Sultanov Bəhruz Yusif oğlu 1974-cü il may ayının 25-də Ermənistan Respublikasının Noyemberyan rayonunun Ləmbəli kəndində anadan olmuşdur.Həmin kənddə böyümüş və orta məktəbin yeddinci sinfini orda bitirmişdir. 1988-ci ilin noyabr ayında yüzlərlə azərbaycanlı ailəsi kimi Bəhruzun ailəsi də dədə-baba yurdunu tərk etməyə məcbur oldu. Ermənistan SSR-dən qovulmuş digər qaçqınlar kimi onlar da Azərbaycan torpağına üz tutdular.Əvvəlcə müvəqqəti olaraq Göyçay rayonunda, sonra isə Nərimanov rayonu ərazisində məskunlaşdılar. Bəhruz orta təhsilini 34 nömrəli tam orta məktəbdə tamamlamışdır. Sonra Rabitə Nazirliyinin təsərrüfat emalatxanasında əmək fəaliyyətinə başlamışdır. Bir il işlədikdən sonra, 1992-ci il iyul ayında həqiqi hərbi xidmətə çağırılmışdır.

Əvvəlcə o Laçın rayonundakı 711 və 701 saylı hərbi hissələrdə xidmət etmişdir. O, Laçın torpaqları və Hoçaz dağı uğrunda gedən döyüşlərin iştirakçısı olmuşdur. Bəhruzgilin hərbi hissəsi düşmən Kəlbəcərə hücum edəndə oraya aparılmışdır. Yoldaşlarının dediyinə görə Bəhruz düşmənin həmlələlərinə cavab verən birinçilər sırasında olmuşdur. Kəlbəcər işğal olunduqdan sonra B.Sultanov Xanlar rayonunun Hacıkənd sahəsində yerləşən 701 saylı hərbi hissənin kəşfiyyat tağımında rabitəçi vəzifəsində hərbi xidmətini davam etdirmişdir. Bəhruz 1993-cü il avqust ayının 13-də Murov dağı uğrunda gedən döyüşlərdə boğaz nahiyəsindən aldığı qəlpə yaralarını müalicə etdirmək məqsədi ilə Bakı şəhər hərbi qospitalına gətirilmiş və sentyabr ayının 8-də qospitalda şəhid olmuşdur.   Qəbri Bakıda Şəhidlər Xiyabanındadır. Bəhruz subay idi. Oxuduğu 34 nömrəli tam orta məktəb onun adını daşıyır.